Nuup Kommuneani pisortat aamma atorluaapput
Nuup Kommuniani pisortat attartortuunermiit piginnittuunermut aaqqissuussineq aamma paasilersimavaat. Tamanna erserpoq illut Nuup Kommuniata tunisimasai pillugit allattukkani Radioaviisip pissarsiarisaani.
Tassani takuneqarsinnaavoq kommunimi allaffissornikkut pisortaanerup atorfimminut atatillugu illuni 800.000 koruunilerlugu pisiarisimagaa. Illu tamanut tuniniarneqaraluaruni 1,8 millioni koruuninik akeqassagaluarpoq.
Aammattaaq kommunip sulisoqarnermut pisortaata, aningaasaqarnermut pisortaata aamma siusinnerusukkut akileraartarnermut pisortaata atorfimminnut atatillugu illutik pisiarisimavaat.
Taakkua ataatsimut katillugit avammut tuniniarneqaraluarunik akiinut naleqqiullugit 2 millioni koruuninik akikinnerusumik akilerlugit pisiarisimavaat. Tamanna Borgmesterip Agnethe Davidsenip ajoriffissaqartinngilaa.
- Attartortuunerminngaaniit piginnittuunermut inatsit malillugu taakku innuttaasutut allatulli periarfissaqarsimapput. Taavalu aamma tunineranut atatillugu nalilersorneqarneranut assigeeqqissaamik periuseqarluta nalilersuineq malillugu taakkua illut tunineqarsimapput.
Nuup Kommuniata 2005-imiit ullumikkumut illut 37-t 27 millioni koruuninik nalillit attartortuunermit piginnittuunermut aaqqissuussinermut atatillugu tunisimavai.
