Nuup Kommuneani isigiarsuttut tappiitsullu pikkorissartut
-Soorlu uanga mobilera uagutsinni sumut ilisarpara puigortoortarlugulu, kiisa arfinilissaa nutaamik pisaarpunga, taava nutaamik atortorissaarummik nassaartoqarsimavoq, soorlu mobilinnut, matuersaatinnut assigiinngitsunullu arlaannut ikkussinnaasakka sisamat, taava tammaaleraanni toortagakasik tuulaannginnarlugu ujarlersinnaavunga nipaalu tusaallugu ujangara nassaareqqillugu, tappiitsuulluni taakku pilerinartorujussuupput, Anna Zeeb ukiut tallimassaat tappiitsuusimasoq pikkorissarnermilu peqataasoq oqarpoq.
Pikkorissartut atortorissaarutinik assigiinngitsunik ilinniagaqarput, soorlu nalunaaqqutaq qanoq ilinersoq paasiniassalugu, alersit qanoq illugiisiinnarneqarsinnaanersut imaluunniit nerisassat qaqugukkut qalannersut. Isigiarsuttut tappiitsullu kisimik pikkorissarneqanngillat, aamma ulluinnarni sullissisut pikkorissarneeqarput.
- sulissilluarnissannut isumasssarsitinneqarnissara pisariaqartippara, qanoq isigiarsuttut tappiitsullu nammineernerulernissaannut ikorfartuisinnaavunga imaluunniit siunnersuisinnaavunga. Assersuutigalugu nerisassiorpata qanoq nammineq sulisinnaappat imaluunniit qanoq ileqqussaannik ilinniartinneqarsinnaappat, Tine Bøgh Jørgensen, Nuup Kommuneani pillorissaasoq pikkorissarnermi angorusutaminik nassuiaalluni oqarpoq.
Pikkorissaanermilu ilitsersuisuusoq Qallunaat Nunaannit tappiitsut isigiarsuttullu instituttianni pillorissaasutut atorfilik, Birthe Rosfeldt tunniussassaqarluarpoq.
-Kuffertersuaq atortorissaarutinik ulikkaartoq nassarpara, ikiuutit soorlu nalunaaqquttaq qanoq ilineranik oqarsinnaasoq, ajaappissat paffit aqqusinermi angalaarluni iluaqutaasinnaasut, iggavimmi atortorissaarutit, ujarliutit nipiliortartut isigiarsuttunut iluaqutaasinnaasut nassarpakka, Birthe Rosfeldt oqarpoq. Tappiitsullu allatut aamma ikorfartorneqarsinnaasut aamma itisiliivoq.
- Soorlu sulisut inimut iserunik imaluunniit inimit anillakkunik, taava oqassapput paasititsillutik sunerminnik, nerrivimmut ilisaqarunik nassuiaallutik suna ilinerlugu. Imaluunniit isigiarsuttoq nerinialerpat oqarlutik sumik sassaalliinerlutik kiisalu oqarlutik qallersuutissami soqarnersoq, assersuutigalugu rullepølse agurketalik, Birthe Rosfeldt oqarpoq.
