Nuup kangerluata naqqa sulluliorfiusinnaanngitsoq

Nuup kangerluatigut Akianut sulluliorniarneq takorluugaannanngoriartorpoq. Nuuk kommuneata nittartagaatigut atuarneqarsinnaavoq, Cowe A/S Asiaq-mik suleqateqarluni sulluliorniarnermik Nuuk kommuneanut siunnersortaasut, sajuppillatitsilluni misissuisimanermit paasisat misissorneqarsimalerput. Galathea 3-ip septembarimi ilisimasassarsiorluni misissuisimaneranit katersorneqarsimasut, immap naqqani misissuinermit paasineqarpoq, Nuup kangerluani, immap naqqa ujaraaraannaasoq, Cowi-lu nalornissutigilersimavaa, immap naqqanik nammineq mississuisimanerminnut naleqqiullugu eqqortuunersoq. Sajuppillatitsilluni Cowe-p siorna misissuinerani immap naqqa qaqqajunaasorineqarsimavoq (fjeldkam) taamalillunilu (fjeldkam) qaarteriarlugu Akianut sulluliortoqarsinnaassangasimalluni.

Nuuk Kommuneani Teknik-imut pisortaq Ove Neumann radioavis-imut oqarpoq, Cowe-p misissuisimanerminik inerniliinera tuaviuussaavallaarsimassasoq. Namminermi COWI-lu isumaqarput, Galathea 3-ip misissuisimanera eqqortuusoq. Taamaassimappallu sulluliorniarneq ajornakusoortorujussuussasoq. Paasissutissiissutigineqartut Nuuk kommuneanit tusaatissatut tiguneqarput, Nuullu illoqarfittut ineriartortinneqarneranut mittarfiliorniarneranullu eqqarsaatinut ilanngunneqarput, Ove Neumann Nuuk Kommueaneersoq oqarpoq. Teknik pillugu kommunalbestyrelsip ataatsimiititaliaani siulitaasoq Gorm B. Kjeldsen, Siumut, paasissutissiissutigineqartut kingulliit pillugit ippassaq oqaaseqartinniaraluaratsigu oqaaseqarusunngilaq.