Nuup Kangerluata Ikinngutai: Naalakkersuisut qineqqusaarnerminni neriorsuutigisatik piviusunngortinngilaat
Avatangiisit illersorneqarnissaannut apeqqutit akineqanngitsut arlaqarput, Avatap siulilttaasua aamma Nuup Kangerluata ikinngutai oqarput, tassalu saviminnissap piiarneqarnerani akuutissanik ulorianartuik atuisoqartussaanera tikkuarneqarput.
-Aleqa Hammond aamma Aatsitassanut Naalakkersuisoq Jens-Erik Kirkegaard qineqqusaarnermi neriorsuutigisatik qimarratigivaat, tamanna ajuusaarnartutut Nuup Kangerluata Ikinngutaannit isumaqarfigaarput, qineqqusaarnermi oqaatigineqarpoq minnerpaamilluunniit kemikalianik mingutitsisoqassappat aatsitassarsiornerit unitsinneqassasut, Piitannguq Tittusen oqarpoq.
Avatangiisinik suliniaqatigiiffik Avataq isumaqarpoq Naalakkersuisut matoqqavallaartut.
Piiaanissamut akuersissumik tunniussinissamut piareersimanngilagut, piaanermut atatillugu avatangiisinut sunniutissai pillugit London Mining-imut apeqqutit akineqanngitsut arlaqarput tamakkualu Siumut inatsisartunut qineqqusaarnermi
naalakkersuisunngortitsinermilu neriorsuutigisaanut naapertuutinngillat, Mikkel Myryp avatangiisit pillugit suliniaqatigiiffimmi Avataqmi siulittaasoq oqarpoq.
Londong Mining saviminissamik piianissamut akuerineqarnerata kingorna peqatigiiffik Nuup Kangerluata ikinngutai piianermi piianissamullu alaatsinaanniarpoq.
- Nuup kangerluata illersorneqarnissaa ingerlattuassavarput aamma aatsitassarsiorneq aallartinneqarpat qanoq mingutitsisoqartiginersoq alaatsinaattuassavarput, soorlu kemikalianik atuinermi kuutsigut mingutitsinerit aamma immamut sunniutai alaatsinaanneqassapput, Piitannguaq Tittusen oqarpoq.
- Naalakkersuisunngortitsinermi naalakkersuisut oqarput savinissarsiutileqatigiiffiup London Miningip qinnuteqaataa ullut hundredit qaangiutsinnagit akineqarumaartoq.
Ullut hundrederit qaanngiuteriikatattatut akuersissut tunniuneqarpoq, taannalu sioqqullugu tusarniaasoqanngilaq innuttaasulluunniit peqataatinneqanngilaat. Taama matoqqatigisumik ingerlatsisoqassappat tamanna nunamut ajortumik kinguneqassasoq Avataq isumaqarpoq
- Matoqqanerujussuaq ulloq manna tikillugu ingerlanneqartoq unittariaqarpoq taamaaliortoqanngippat inuaqatigiinnut sanngiillisaataarujussuussammat Mikkel Myrup Avatap siulittaasua oqarpoq
Aatsitassanut Naalakkersuisoq Jens-Erik Kirkegaard aamma London Mining Kina-mi aatsitassat pillugit nittarsaassinissarsuarmut peqataajartorlutik ataasinngorpat aallassapput.