Nuup Kangerluani umimmaat kisinneqassapput
Nuup eqqaani umimmaat amerliartupiloornerarlugit oqaatigineqartoq ilumoornersoq ilumuunnginnersorluunniit kisitsinikkut paasiniarneqarpoq. Umimmaat Kapisillit eqqaaniittoq kangerluk ikaareersimavaat, Nuullu kujataani Ameralimmi takuneqartalerlutik.
Kommuneqarfik Sermersuup tusarniaassutaanut Pinngortitaleriffik akissuteqaammini allappoq, umimmaat Nuup eqqaaniittut qanoq amerlatiginersut ilisimaneqanngitsoq.
- Nuup eqqaani umimmannik 2002-mi aasakkut takunnittoqaqqaarnerata kingorna amerlisimanissaat ilimanarpoq. Sulilu amerliartornissaat ilimanarluni, kisianni amerleriarujussuarsimanersut uppernarsarneqarsinnaanngilaq, Pinngortitaleriffik taama erseqqissaavoq.
Pinngortitaleriffiup ilanngullugu ilisimatitsissutigaa Kangaamiut Sermianit Nuup Kangerluanut 2001-imit 2013-ip tungaanut sisamariarluni tuttunik kisitsisoqartarmat, taakkunanilu umimmammik ataatsimilluunniit takunnittoqarsimanani. Taamaattumik umimmaat tuttut nerisartagaannut akornutaanersut ilisimatuussutsikkut uppernarsarneqarani.
Aalisarnermut, Piniarnermut nunalerinermullu Naalakkersuisoqarfiup Kommuneqarfik Sermersuup tusarniaaneranut akissuteqaammini oqaatigaa, umimmaat Nunatarsuup eqqaani Saqqarsuarmiittut kisinneqarnissaat siunnersuutigaa.
- Tamaani umimmnannik takkunnittoqartarsimammat, kisitsisoqarnissaa siunnersuutigaarput. Umimmaat amerlassusiat paasereerutsigu tamaani, nunaminertat ilaanni inuussutissarsiutigalugu piniartunut tammajuitsussarsiniarlunilu piniartunut umimmattassiisoqarsinaanera nalilersorneqarsinnaassaaq, Aalisarnermut, Piniarnermut Nunalerinermullu Naalakkersuisoqarfik allappoq.
