Nuup Kangerluani ujaasineq: Politiit angut ajunaarsimassangatikkaat
Politiit angut Nuup Kangerluani imaanut nakkarsimasoq pillugu sapaammi
nalunaaqutaq 17.30 kalerrinneqarput.
Politiit tamatuma kingorna angallamminik Issittumilu Sakkutooqarfiup alapernaarsuutaanik, Tritonimik ujaasititsineq aallartippaat. Angutip ujaarineqarnerani qulimiguullit aamma atorneqarput.
Sapaammili unnukkut kingusissukkut taarsivallaarnera pissutigalugu ujaasineq nunatsinni politiinit Issittumi Sakkutooqarfimmiillu unitsinneqarpoq.
- Ippassaq taarsivallaarnera pissutigalugu ujaasinerput unitsipparput. Maanna qaammareermat angut ujaariniaqqileruttorparput, Nuummi politiini pigaartut pisortaat, Malik Olesen oqarpoq.
Angutilli imaani ajunaarsimanissaa politiit aarlerissutigaat.
- Angut suli imaaniissimaguni ajunaarsimanissaa ajoraluartumik ilimagisariaqarparput. Tamannali qulakkeersinnaanngilarput, kisianni piffissaq ingerlareeqimmat ajoraluartumik ajunaarsimasoraarput, pigaartut pisortaat oqarpoq.
Taassuma umiatsiaaqqat angallatillu sumiiffiup eqqaaniittut angummik ujaasimisaarnissaat kaammattuutigaa.