Nuup eqqaani kuultisiortoqartussanngorpoq
Nuup Kangerluani Qeqertarsuarmi ukiut pingasut qaangiuppata annertuumik kuultisiorfeqalissaaq, NunaMineralsip suleqataata canadameersup Nuukfjord Gold Minesip millioninik pingasunik kisitsitalimmik aningaasaliinerata kingorna, NunaMineralsip siulersuisuini siulittaasoq, Anthon Christoffersen oqarpoq.
Allattoq Janus Maqé
novembarip 10-at 2009 08:03
- Nuup Kangerluani Qeqertarsuarmi kuultisiorfimmik angisuumik ingerlatsisoqalernissaa 2012-mi 2013-miluunniit naatsorsuutigisinnaavarput.
Suleqatitaarnerup kingorna aningaasaliisoqarneratigut misissuinerit ingerlaqqilerneri isumalluarnartoqarnerarpai. NunaMineralsip suleqataa canadameersoq Nuukfjord Gold Minesi canadamiut dollariinik 23 millioniinik aningaasaliivoq 2010-mi qillerinissanut.
- 106 million koruunit missaannik aningaasaliipput Qeqertarsuarmi qanoq kuulteqartiginersoq nalilerluarniarlugu, tamanna NunaMineralsimi assut naammagisimaarparput, NunaMineralsimut ajunngeqaaq, Anthon Christoffersen oqarpoq.
