Nuup Bussiini ingerlatitsisut isumannaallisaaffigalugit suleriaaseq allanngortinneqarpoq

Nuup Bussiinik ingerlatitsisup utertussamaatissaanik buskortiutaanillu 28.000 koruuninik nalilinnik arfininngormat ullaap tungaagut tillittoq suli maannamut kinaassusersineqanngilaq. Angut tunuagut suugaluarnersumik manngertumik niaqqumigut taamani anaaneqarpoq nammattagaalu tiguneqarluni, Niels Nyvang politiinit ilisimatitsivoq.

Ingerlatitsisoq qiteqqunnermini angerlarsimaffmmi Saviminilerinermik Ilinniarfiup kælderiani errorsisarfimmiitilluni saassunneqarpoq nammattakkamillu ujajaaffigitilluni.

Nuup Bussii nutaamik paarnaarsartumik aningaaseriveqalerput, asuli taskit nalilinnik imallit angallattariaqarunnaarsillugit.

- Bussinik ingerlatitsisut isumannaannerusumik qiteqquttarnissaat qulakkeerniarlugu sikaavinnik paarnaarsartunik atuilernermik saniatigut nalilinnik tigummiaqarnissaq killilersorneqalerpoq, Michael Driefer oqarpoq.

Peqatigitillugu innuttaasunut ikioqqupput.

- Inummik sakkortuumik saassussinermut atatillugu innuttaasut qinnuigissavagut ilisimannikkunik politiinut saaffiginneqqullugit. Taskeq, billetinut maskiinaq allallu tammartut aamma tigoqqikkusuppavut. Paasissutissiisinnaasoqaruni qujanassaqaaq, oqarpoq.

Politiit oqarasuaatikkut uunga sianerluni attavigineqarsinnaapput: 32 14 48.