Nuup borgmesteria atsioqataavoq

Japanimiut takornariartaataat ”Peace Boat”, ullumi Nuummiittoq, takornarianik angallassiinnarani aamma sakkut atomitallit akiorniarlugit angalavoq.
Allattoq Elisa Isaksen
juulip 07-at 2008 17:26

Angalaneq taagorneqarpoq ”Borgmesterit eqqissinermik anguniagallit”, taamaammallu Nuup borgmesteria, Nikolaj Heinrich umiarsuarmut ullumi ikaarpoq nunarsuatsinni sakkut atomitallit nungusarneqarnissaannut isumaqataasutut atsioriartorluni.

Sorsunnersuup kingulliup naalernerani Japanimi illoqarfiit Nagasakip Hiroshimallu qaartartunik atomitalinnik nakkartitsiffigineqarnerat eqqaaniarlugit suliniaqatigiiffik 1982-imi pilersinneqarpoq. Suliniaqatigiiffik naalagaaffinni 122-ni illoqarfinnit 1.793-init tapersersorneqartoq ullumi tassa Nuummut tikippoq.

Nikolaj Heinrich atsiornermini japanimiut angalanermi pisortaanit najorneqartoq oqarpoq, nammineq inuttut anguniagaq tapersersorini, soorluttaaq nunatsinni tamani tapersersuineq naapertorlugu atsiorluni. Namminersornerullutimmi Oqartussat 1984-imili Kalaallit Nunaat sakkunik atomitalinnik inissiiffigineqassanngitsoq aalajangereernikuuaat.

Takornariartaat Peace Boat Japanimut uterpat, atsiukkat Hiroshimap borgmesterianut, Tadatoshi Akibamut tunniuneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq