Nuummioq Varietymi allaaserineqarpoq
Nunat allamiut filmiliaat Oscarimut nersornaaserneqartussatut innersuunneqartut atuagassiami tassani allaaserineqarput, ilaatigut filmi Nuummioq kalaallit filmiliaannit siullersaalluni Oscarinnattussatut innersuunneqartoq allaaserineqarluni.
Filmimi inuttaasut Angunnguaq Larsen Lars Rosingilu atuagassiami aamma assitaliunneqarsimapput. Filmip Nuummiup Sundancefilmfestivalimi nittasaanneqarnera atuagassiami aamma allaaserineqarpoq.
Nuummioq nunat allamiut filmiliaat 65-it peqatigalugit Oscarinnattussatut innersuuneqarpoq.
Oscarimik nersornaasiineq Hollywoodimi februarip ulluisa 27-anni pissaaq.
Nunat allamiut filmiliaat tallimat Oscarimik nersornaaserneqartussatut innersuuneqartut januaarip 25-ani tamanut nalunaarutigineqassapput, taamanikkusamullu paasinarsissaaq Filme Nuummioq ilaassanersoq.
