Nuummioq Inullu Tysklandimi takutinneqassapput

Filmi Nuummioq  Oscarinnattussatut upernaaq manna piukkunneqarnermi  kingorna nunani tamalaani takutinneqaqattaalerpoq.

"Nuummioq" Tysklandimi Kielimi maanna takutinneqartussanngorpoq, soorlu aamma Mike Magidsonip filmiliaa "Inuk" takutinneqartussanngortoq.

Filmfestimik taallugu kalaallit filmiliaannik takutitsinissaq Tysk-dansk selskabimit aaqqissugaavoq, filmillu arfininngorpat takutinneqalerpata, "Nuummioq"-mik ilitsersuisoq Otto Rosing peqataassaaq.

Nuummiumi produceri Mikisoq H. Lynge oqarpoq filmip Oscarinnattussatut piukkunneqarnermi kingorna filmi nunani tamalaani soqutigineqaleraluttuinnarsimasoq.

Filmi Danmarkimi pisortatigoortumik suli takutinneqanngilaq, Kalaallit Nunaatali Koldingimi immikkut sammineqarnerani takutinneqarnikuulluni.

Filmi "Inuit nu"-mik taallugu kulturikkut pikialaartitsinermi qaammatip massuma ingerlanerani takutinneqarumaarpoq.

Filmit Kalaallit Nunaannut tunngassuteqartut aqqaneq-marluk allat Kielimi takutinneqartussaapput, "Nuummioq"-p aamma "Inuk"-p saniatigut assersuutigalugu Ivalo Frankip filmiliaa "Echoes", qallunaat filmiliaat "Eksperimentet", tyskit filmiliaat "S.O.S. Isbjerg", Schweizimiut pisimasuinnik tunngavilimmik filmiliaat "Hvid horisont", meeqqanullu filmiliaq "Lars - den lille isbjørn" takutinneqartussanut ilaallutik.

Kielimi pisussat pillugit paasissutissat sukumiinerusut nittartakkatsinni knr.gl-ikkut tassuugu takuneqarsinnaalissapput.