Nuummiit Sisimiunut bilitsi aaqqiagiinngissummut aallarniutaavoq
Demokraatit partiianni Per Berthelsenimik akerlilersuilersut isumaqarput, suut tamarmik aallartissutigisaat tassaasoq, Demokraatit politikkikkut oqaaseqartartuata partiimilu siulittaasup tulliata, Palle Christiansenip, inatsisartut upernaakkut ataatsimiinnerisa nalaani, Qeqqata kommunissaanut atatillugu ikaarsaariarnermut ataatsimiititaliami ilaasortanngornermini katersuunnermi siullermi ataatsimeeqataanissaminut akuerineqarnissaa. Nuummiit Sisimiunut uterlugulu bilitsi.
Demokraatit siulersuisuunerisa ullumi ilisimatitsissutigaat, Demokraatit siulittaasuata Per Berthelsenip nammineq allakkatigut apriilip ulluisa 21-iannili nalunaarutigisimagaa, Palle Christiansenip aallarnissaa partiimi siulersuisuunerit akuerissappassuk, nammineq immikkut ittumik partiip ataatsimeersuartitsinissaa piumasariniarini, taamaalilluni Demokraatini siulersuisuunerit allanik inuttaqalerniassammata, allamilluunniit siulittaasoqalerniassammat.
Siulersuisuunerni ilaasortaatut allakkiami atsiorsimapput Ane-Marie Schmidt Hansen, Astrid Fleischer Rex, Karen M. Lynge, Palle Christiansen aamma Jens B. Frederiksen.
Allakkiortut erseqqissaatigaat, Per Berthelseni taamani siulersuisuunerni kisiartaalluni Palle Christiansenip aallarnissamut qinnuteqaataanut akerliusimasoq, taassumalu kingunerisaanik ima allagaqartoq:
- Palle pillugu akissuteqaat nassiunneqartoq tunngavigalugu paasivara uanga sulinera tamaanga killeqartoq…. Siulersuisuunerit, takusinnaasakka tunngavigalugit siulittaasup tulliata pissusilersornera uparuaavigillannguarnagu akuersissutigisimammassuk. Taamaattumik qanoq ilillunga sulinerma ingerlateriaqqinnissaa takusinnaanngivippara….
Ulloqeqqa sioqqutilaannguartoq Per Berthelsen maanna feeriartoq oqaloqatigaarput, imalu Demokraatit siulersuisuunerisa oqaasiinut akissuteqarpoq:
- Salluliuutinik assigiinngitsunik imaqarpoq. Palle qanorsuaq angalasinnaavoq, kisianni inatsisartut siulittaasoqarfiannit aatsaat akuersissummik pereeruni. Palle Christiansenip angalanissani qinnutigeqqaarnagu siulersuisuunernut itigartitaanini maalaarutigisimavaa. Tamanna ilumuunngilaq, Per Berthelsen Danmarkip tungaanut maanna ingerlaartoq oqarpoq.
Per Berthelsenillu oqaatigerusunngilaa Demokraatit partiiat qimakkuniuk qanoq iliuuseqassanerluni imaluunniit partii sorleq suleqatigilerumaarnerlugu.
Demokraatini siulersuisuunerit allagaanni aamma isumaqartoqarpoq, Per Berthelsenip siulittaasutut sukanganiartarnermigut mailikkullu allakkatigut inatsisartuni ilaasortaqatini sulisullu qimaatittarai.
Radioavisimiit partiit allat apersorniarsimagaluarpagut Per Berthelseni saaffiginnissagaluarpat suleqatigilissaneraat.
Inuit Ataqatigiit siulittaasuat oqarpoq nammineq suli isummerfigisimanagu.
