Nuummi uumasut nakorsaat matulerpoq
Nuummi Dyrenes Klinik Aps-imik piginnittoq Pia Cordt Olsen aalajangerpoq uumasunut nakorsiartarfiutini maajip qulingat matuniarlugu. Nuummi angerlarsimaffimmi uumasuutilippassuit ernumaammersimaarput. Maajilli qulingata kingorna qanoq pisoqarnissaanik tusarnissaminnut utaqqigallartariaqassapput.
Pia Cordt Olsenip uumasunut nakorsiartarfiutini 2010 aallartilaartoq Nuummi ammarpaa. Maannali tassa aalajangerpoq matuniarlugu. Qanoq pisoqarnissaa Namminersorlutik Oqartussani nersutit nakorsaasa pisortaa Hanne Høybye aamma Kommuneqarfik Sermersuummi sanarfinermut avatangiisinullu immikkoortumi pisortaq Jan Karlsson ippassaq ataatsimeeqatigiipput.
- Maannamut taamaallaat oqaatigisinnaavarput pissutsit nalilersorneqartut, Jan Karlsson oqarpoq.
Qimmiutillit akiuussutissanik, naartusinnaajunnaarsitsinerit imaluunniit naartunaveersaatinik kapisititsiniaraangamik nersutit nakorsaannut namminersortumut saaffiginnittarsimapput. Allanillu uumasuutilippassuit aamma Dyrenes Klinik-imut saaffiginnittuartarsimapput.
Ilulissani aamma nersutit nakorsaqarpoq taassumalu qimmeqarfinni qimmit qimuttut pingaarnertut nakkutigisarivai.
Qaqortumi aamma nersutit nakorsaqarpoq taassumalu savaatillit pisariaqartitaat pingaarnertut isumagisarivai. Savat qimmii akiuussutissalersortarpai aammalu inuussutissalerinermi nakkutilliisarluni
Angerlarsimaffinni uumasuutit nakorsarneqartarnerat Nuummk namminersortumit maannamut ingerlanneqarsimavoq Dyrenes Klinik ukiut kingulliit marluk tassannga isumaginnittuulluni.
Illoqarfinni allani kommuunip akiuussutissanik kapuisartua qimmit perlerornermut nappaatinullu allanut kapuinermik isumaginnittuusarpoq. Uumasulli napparsimatillugit passuttariaqartillugilluunniit akiuussutissanik kapuisartoq ikiuussinnaanngilaq.
Uumasut peqqissaartumik isumagineqarnissaat aamma timimikkut pisattamikkullu, pissusilersortarnermikkut peqqissuunissamikkullu pisariaqartitaat mianeralugit periaatsit akuerisaasut ilisimatuussutsikkullu ilisimalikkat naapertorlugit paarineqassasut, uumasunik illersuineq pillugu Nunatsinni inatsimmi allassimavoq.
