Nuummi utoqqalinersiutillit tapisiaat nalimmassarneqalerput

Nuup Kommuneani naatsorsuinerliorneq peqqutaalluni utoqqalinersiallit angivallaamik tapisitinneqartartut, kommunit kattussuunneqarnissaannut piareersarnermut atatillugu isumaginnittoqarfimmit kisitseqqissaarnermi paasineqarpoq, tamannalu januaarip aallaqqaataa aallarnerlugu allanngortinneqartussanngorpoq.
Allattoq Louise M. Kleemann
decembarip 03-at 2008 10:14

- Kukkuneq 1984-imili pisimavoq. Taamani kommunalbestyrelsip kommunip aningaasatigut inissisimanera ajunngimmat aalajangersimavoq tunniunneqartartut qulaallugitinissinneqassasut. Taamalu inummut tapit aammalu atugassat naapertorlugit tapit kukkusut ukiuni 24-ni atuutsinneqarsimapput politikerit, atorfillit imaluunniit naatsorsuuserisut isornartoqartissimanngisaannik, Nikolaj Heinrich nassuiaavoq.

- Allannguinissaq tamatta nuannarinngeqaarput, paasinarluinnartumillu utoqqaat allannguinissamut tunngasumik paasitinneqarnertik suli uatsinniit nuannarinnginneruaat, tamannami utoqqaat ilaannut atugarliornerulernermik kinguneqartussaavoq. Taamaakkaluartoq utoqqaat peqatigiiffiannit paasilluarneqarpoq inatsisartut peqqussutaat tamatsinnit maleruarneqartariaqarmat, borgmesteri Nikolaj Heinrich ataatsimeereernerup kingorna oqarpoq.

Inummut tapitigut aammalu atugassat naapertorlugit tapitigut allannguisoqarnissaata kingunerissavaa utoqqalinersiallit atugassat naapertorlugit tapisiamikkut innersuussanit qaffasinnerusumik pisartagaqartut ikinnerusunik pisartagaqalernissaat aammalu tapisiamikkut innersuussanit appasinnerusunik pisartagaqartut amerlanerusunik pisartagaqalernissaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq