Nuummi toqutsisoqarsimasinneranik misissuisoqarpoq

Nuummi politiit toqutsisoqarsimasinnaaneranik maanna paasiniaaleruttorput. Nuummi Qapiarfiusaami blok 17-ip silataani, pingasunngornermi ualikkut tallimanut qiteqquttoq, inuk toqungasoq politiinut nalunaarutigineqareersorlu, toqutsisoqarsimasinnaanera paasiniarneqalerpoq.
Allattoq Elisa Isaksen
juunip 22-at 2012 09:29

Nakorsaq aggersarneqarmat, angutip toqoreersimanera uppernarsareermagu, politiit paasiniaallutik killisiuillutillu ingerlaannarlutik aallartipput.

Killisiuisoqareermat toqutsisoqarsimasinnaanera pasitsaanneqarpoq, Politimestereqarfimmeersoq Viggo Johansen tusagassiuutinut allappoq.

Suliamut atatillugu inuit arlallit tigusaareerput, tamatumunngalu atatillugu inatsit tunngaviusoq naapertorlugu inunnik qassinik killilersuisoqarnersoq Viggo Johansenip paasissutissiissutigererusunngikkallarpaa.  

- Suli misissuinerput pissutigalugu aamma toqusup timaata suli misissuiffigineqarnera pissutigalugu annerusumik paasissutissiisinnaanngilagut, Viggo Johansen oqarpoq.

Paasiniaanermut atatillugu toqusoqarsimatillugu misissuisartoq Danmarkimeersoq, politiit aamma ikiortiserereerpaat.

- Neriuppugut tallimanngornermi annerusumik paasissutissiisinnaassalluta. Toqutsisoqarsimasinnaanerali mattutinngilarput Viggo Johansen oqarpoq.

Inuit allat pisumik takunnissimasinnaasut pisorluunniit pillugu ilisimasaqartut, Nuummi politiit oqarasuaataanut 32 14 48-mut - tassa 32 14 48-mut sianerlutik saaffiginneqquneqarput.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq