Nuummi timersornersuaq

Nuummi inuit 2.000-t peqqissuunerujumalluni timersualaarnernut maajip qaammataani immikkut aaqqissuussanut peqataapput.

”Maaji peqqinnartoq 2007”-imik taallugu Nuummi aaqqissuussaq, qaammat suli naavinngikkaluartoq NAAPE ippassaq Pinsip aappaani naggataarluni arpatsitsimmat inuit – meeqqanit utoqqarnut - 250-t silagissuup ataani peqataasimasut, aaqqissueqataasoq Kim Godtfredsen nalunaarpoq.

3, 10 aamma 18 kilometerimut arpannermi peqataasinnaanerit saniatigut sukisaarsaatit peqqinnartut 15-t, soorlu akeqanngitsumik sisoqqannerit, nalunnerit, arpaqatigiinnerit, cykeleqatigiinnerit timigissarnerillu maajip qaammataani ingerlanneqaqattaarput.

- Torrallalluinnaqqissaarparput, tulluusimaarnaqaaq naammassimmat, aappaagu aamma taamaalioqqissaagut, Kim Godtfredsen oqarpoq.

Radioavisimit aperigatsinni nuna tamakkerlugu ”maaji peqqinnartoq” aaqqissuussanngortikkusunneraat, akivoq soorunami taamaaliornissaq pilerinartoq.

- Kisianni nukippaalussuit atortariaqassapput. Suliffeqarfiit, pisiniarfiit allallu peqataasariaqassagamik. Kim Godtfredsen erseqqissaavoq.

Arpattartoqatigiit Naape tullianik Nuummi arpatsitsissapput inuiattut ullorsiorutta juunip ulluisa 21-nni.