Nuummi teriarsuit assigiinngitsut marluk takussaalerput
Nuummi blok 4-p eqqaani meeqqat juuli qiteqquttoq pinnguartillutik teriarsuarmik eqqakkanut kuuffimmiittartumik toqungasumik nassaarput. Nassaavat inersimasumit sanioqquttumit Niels Poulsenimit Kommuneqarfik Sermersuumi Avatangiisinut Teknikkimullu Ingerlatsivimmukaanneqarpoq.
- Teriarsuaq toqungasoq meeqqat assaannarminnik tigummiarpaat. Nunami putumi blok 4-p toqqammaviata eqqaaniittumi teriarsuaq nassaarisimavaat, Niels Poulsen Kommuneqarfik Sermersuup nittartagaani oqaluttuartoq atuarneqarsinnaavoq.
Avatangiisinut ingeniørip Anna Geop, Kommuneqarfik Sermersuumi Pinngortitamut Piujuartitsinermullu Immikkoortortami atorfiliup, uppernarsarpaa blok 4-p eqqaani teriarsuarmik toqungasumik nassaartoqarsimanera.
- Uumasunut nakorsap takuaa, taannalu isumaqarpoq tassaasoq teriarsuaq eqqakkanut kuuffimmiittartuussasoq uumasuutigineqartartuunngitsorlu nujuitsoq. Uumasunut nakorsaq inatsivoq allanik takkuttoqaqqinnissaa utaqqimaarneqassasoq arlaannik iliuuseqartoqarnissaanut aalajangiisoqartinnagu. Assersuutigalugu kisimiittuusinnaavoq umiarsuarmit nunamut pisimasoq, avatangiisinut ingeniøri oqarpoq.
Innuttaasut ataasiakkaat teriarsuarmik takusorisimasut kommunimut saaffiginnimmata kommuneqarfiup ISS piumaffigaa illoqarfiup qeqqani allakkerisarfiup, grillip aamma katersortarfiup eqqaanni teriarsuarnik nungusaaqqullugu.
ISS-ip uumasunik ajoqutaasunik akiuiniaasartuisa illoqarfiup qeqqani assigiinngitsuni teriarsuit uumasuutigineqartartut nujuitsut sisamat toqussimavaat. Pingasut Hotel Godthåbip eqqaani ataaserlu Qullilerfimmi illup eqqaani.
