Politiit ullormut nalunaarutaat: Nuummi suli tillinniartoqaqattaartoq
Ulloq unnuarlu kingulleq nalinginnaasumik eqqissisimavoq, Kalaallit Nunaanni politiit pigaartuisa pisortaat Poul Kreutzmann paasissutissiivoq.
Inuusuttuugunartulli arlallit illumut angerlarsimaffimmut iserniarsarisut, Nuummi politiit unnuaq ataatsip qeqqa qaangilaaraa pisumut ornigutsinneqarput.
Nuummi sivitsortumik tillinniartoqaqattaarnera suli univissimanngitsoq malunnartoq Poul Kreutzmann oqarpoq. Politiit inuusuttuaqqanik tillinniaqattaartunik tillinniariaqattaartunillu, ulloq unnuarlu angerlarsimaffinneersunik unnuami aneertunik angerlaassisarsimapput.
Taamaattumik Poul Kreutzmannip innuttaasut sissuerneroqqullugit kajumissaarpai:
- Matut, quit biilillu parnaartarnissai eqqaamallugu, taanna oqarpoq.
Aasaq, grillerineq imigassarlu aalakoornartulik
Maanna aasarluinnalerpoq, taamaammallu grillerisoqallattaalerpoq, imagassarlu aalakoornartulik tassunga ilaakkajuppoq.
Silap kissakkiartornerani imigassamik aalakoornartortalimmik imertoqarnerulertartoq, Poul Kreutzmann oqarpoq. Tamanna pillugu biilerluni nuannaarniutigalugu grillerisunukalersaartunut erseqqissumik kajumissaaruteqarpoq:
- Aalakoornartulimmik imigassartussaguit biilitit qimaannakkit. Ilimagisamiimmi aak aalakoornartortaqakkajunnerusarpoq, taanna oqarpoq.
