Arsaanneq: Silami arsaannermi nunanut allanut unammisartut Danmarkimi tamaviaartitaassaqisut
Silami arsaannermi kalaallit nunanut allanut unammisartut Jyllandip arsaattarfiini junip aallartilaarnerani sungiusaqatigiittussanngorput pikkorissunullu pingasoriarlutik unammissallutik.
Superligami unammisartut Silkeborg IFip paarlatsissamaataanut junip pingajuani Silkeborgimi unammineq kalaallit arsaattartut sungiusimanngisaannik avatangiiseqarluni pissaaq.
- Unammineq angisuujussaaq Superligami unammisartutut avatangiiseqarfiussagami aammalu arsaattartuvut qallunaanik pikkorivissunik unammisaqartussaallutik, nuna tamakkerlugu sungiusaasoq Morten Rutkjær KNR-mut oqarpoq.
Tyskit iligiit unammissavaat
Aamma Sydslesvigimut unammissapput taakkulu ukiut sisamakkaarlugit unammersuarnernut angisuunut anngunniunnermi unammeqataasarput.
- Iligiit taakku tyskit arsaattartut kattuffissuata ataaniipput ukiut sisamakkaarlugit EM-mut anngunniunnermi unammeqatasarlutik. Taakku EM-mut anngunniunnissamut piareersaleruttortut Flensborgimi unammissavagut, Morten Rutkjær oqaluttuarpoq.
Amerikap avannaani arsaattartut kattuffissuannut Concacafimut kalaallit ilaasortanngorniarlutik qinnuteqaataat suliarineqaleruttorpoq. Piffissamilu aggersuni arsaattartut sammisaqartarnissaat ilaasortanngorusulluni malugeqqunermik aamma tunngaveqarput.
Taamaattumik aamma oktoberimi sungiusaqatigiittoqarnissaa aalajangersimasumik siunertaqarfiusoq sulissutigineqarpoq.
- Nunanut allanut unammisartut oktoberimi unammeqqinnissaat sulissutigaarput taamaasilluta ukioq silami arsaaffiusoq sivitsorniassagatsigu. Taamaasiortariaqarpugut Concacafimut ilaasortanngorniarnermi piumasaqaatit naammassiniassagutsigit, Morten Rutkjær oqarpoq.
Nunatsinni pissartanngorniunneq julip naanerani pilerpat aamma tikissamaarpoq unmminernut malinnaajartorluni aammalu oktoberimi sungiusaqatigiinnermut qaaqqusassaqqissinnaasunik nutaanik piukkunnartoqarnersoq alaatsinaakkiartorluni.
