Nuummi qinersivimmi qinersiartortut: Qinersiartorniaritsi !
Folketingimut qinersineq aallartissimaleruttorpoq, nunatsinnilu tamani qinersisartut qinersiartukaapput.
Anja KNR-ip Nuummi qinersivimmi oqaloqatigisaasa siullersaaraat taannalu aperivarput sooq qinersiartorsimanersoq:
- Kikkut tamarmik qinersinissaat pingaaruteqarmat, uagummi aalajangigassaraarput qanoq ingerlariaqqissanerluta, Anja oqarpoq.
Folketingemut qinersinissaminut qineqqusaarnermi samminneqartuni, Anjap qinersinissaanut aalajangiisuusoq tassaavoq peqqinnissaqarfik.
Peqqinnissaqarfimmi ajornartorsiortoqarpoq. Peqqinnissaqarfimmi suliassat qanoq ililluta Kalaallit Nunaanni kivissinnaavagut ? Tamassummi annertuumik ajornartorsiutaanera eqqarsaatigineruara.
Qinersisinnaasut tamarmik qinersiartornissaat Anjap kaamattuutigaa.
- Inuit sunniuteqaqataarusukkuni qinersineq sunniuteqaqataanertut isigineqarsinnaavoq. Taamaattumik qinersiaritsi, Nuummi qinersisartut ilaat Anja oqarpoq.
Sorsunnersuup aappaa misiginikuuaa tamannalu kinguaavisa misigissanngilaat
82-inik ukiulik Horst Berg Tysklandimeersuuvoq danskisulu innutaasuuseqarluni nunatsinnilu ukiuni 43-ni najugaqarluni. Taanna aamma qinersiartorpoq.
- Aap, danskisut innutaassuserqarpunga, Tysklandimili 1940-mi sorsunnersuup kingulliup aallartilaarnerani inunngorpunga. Pingasunik qitornaqarpunga pingasunillu ernutaqarlunga. Tysklandimi sorsunnerup nalaani misigisattut misigisaqanngisaannassasut neriuppunga. Taamaammat Tillie qinerpara, isummannut qaninnerusumik isumaqarmat.
Horstillu isummani ima nassuiarpaa.
- Kalaallit Nunaata sakkutuujussaatitaaneq atuutilersissagaa, inuusuttullu piumagunik sakkutuunngussasut.
Taassumali isumaa naapertorlugu nunarput Ruslandimiit qaartartut igeriuttakkat aqqutigisinnaasaaniippoq.
Horstip allat aamma qinersinissaannik kaammattorpai.
Kingornatigut avaalaartarneq iluaqutaassanngilaq
Hans Peter Kristensen 66-nik ukiulik qinerseqqammersoq aamma naapipparput.
- Oqartussaaqataanerup ataani qinersiartussanerluta aalajangissallugu pisinnaatitaaffeqaratta, qinersisoqartillugu qinersiuaannarpunga. Aamma nunatta Danmarkillu akornanni ukiuni kingullerni pisimasut eqqarsaatigaakka. Folketingimut ilaasortanik nunatsinnik illersuisinnaasunik pisariaqartitsivugut.
Hans Peter Kristensen forklarer de centrale emner, som har været afgørende for hans stemme.
- Piffissami kingullermi sammineqartut tassalu niviarsiaqqat spiralilersorneqarsimanerat, qallunaallu kalaallinut iliuuserisimasaat Hans Peter Kristensenip qinersilerami eqqarsaatigisimavai, suliassammi tamakku kinguaatta sammisussaassaammatigit.
Taamaammat Hans Peter Kristensen qinersisartut allat qinersiartorlugit kaammattuivoq.
Nuummi qinersiartukaalluartut
Nuummi qinersivimmi illorsuarmi Timersortarfimmut qinersiartortut takkussuulluartut, Nuummi qinersivimmmi qinersisitsisoq Bea Mølgaard Lennert KNR-imut taama oqarpoq.
- Inuit takkussuulluartorujussuupput, immaqa silagillunilu nuannermat inuippassuit takkupput naatsorsuutigisatsinnit aamma amerlanerupput, takkussuuttuni maluginiarpara, inuusuttuunerusut inersimasut utoqqaallu qinersiartortut, tamarmik akulerullutik takkussorput, Beq Mølgaard Lennert oqarpoq, tassuma naatsorsuutigaa ullup qeqqata missaani aammma soraarfiup nalaani qinersiartortut amerlanerunissaat.
Nuummi qinersisinnaasut 13.904 -pput taakkualu 11 procent sinnilaarlugit amerlatigisut ullup qeqqata tungaanut qinersipput, qinersisartut 1500 aamma 1600 tungaanut amerlatigisut qinersiartorlutik.
Nuummi qinersivimmi kingullermik folketingemut qinersinermit sanilliussassaateqanngilllat. Qinersisitsisumut Bea Mølgaard Lennertimut apeqqutigaarput qinersisartut 11 procent sinnilaarlugit qinersiartorsimanerat qanoq nalileneqarsinnaanersoq ? - Nuummi innutaasut 14.000 ngajaat qinersiartorsinnaapput taakkualu 1600 tungaanut qinersiartorsimanerat ikilaarput qinersisarnernut allanut sanilliullugit kisianni ullaap tungaani qinersiartortut ullaap tungaani takkussuuterusaarsimmamata natsorsuutigaarput ualip ingerlanerani qinersisartut takkussuuterusaarnissaat, Nuummi folketingemut qinersivimmmi qinersisitsisoq Bea Mølgard Lennert taama oqarpoq.
Nuummi qinersisinnaasut 13.904-iupput.