Nuummi praktikkerfissat amerlanerusariaqaraluarput
Sanaartornermik Ilinniarfiup ilinnialerniarlutik qinnuteqartuni qassit ilinniarfissarsisimanersut misissuiffigisimavaa, ilinnialerniarlutik qinnuteqartut ukioq manna katillugit 327-upput, taakkunannga 243-t ilinniakkamik aallartitsillutik. 56-iinnaalli ilinniarnerminnut atatillugu ilinniartuuffissaminnik tassa praktikkerfissaminnik pissarsipput.
Sanaartornermik Ilinniarfiup kisitsisit oktobarip 19-ani naatsorsimavai, ilinniartutullu tigutissimasut nalinginnaasumik 90-it ilinniarnerminnut atatillugu suliffimmik ilinniartuuffissaminnik pissarsisarput.
Tassa ilinniartut ilinniartuuffissamik pissarsisut ukioq manna 38 procentinik ikileriarsimapput.
Sulisitsisut Peqatigiiffiata GAp nittartagaani taama allaaserinnittoqarpoq.
- Namminersorlutik Oqartussat sanaartugassanut aningaasaliissutaat illoqarfinnut assigiinngitsunut agguataarnerat takugaanni ilinniarfiusinnaasut takuneqarsinnaapput, Nuummulli aningaasaliissutit qiviaraanni takuneqarsinnaavoq sanaartornermik fagini ilinniartut ilinniartuuffissaqartut aqqaneq-marluinnaasut, illoqarfinnut allanut naleqqiullugit ikinnerullutik. Assersuutigalugu Qaqortumi ilinniartut ilinniartuuffissaqartut 15-iusut, Sulisitsisut Peqatigiiffianni allapput nangillutillu:
- Nuummi sanaartornissamut aningaasaliissutit amerlammata, illoqarfimmi tassani ilinniartuusinnaasut amerlanerusariaqaraluarput. Taamaammat suliffeqarfiit amerlanerusunik ilinniartuuteqartaqqullugit kajumissaarusuppavut, Sulisitsisut Peqatigiiffiannit allapput.
