Nuummi politiit tillinniarsimasunik suli ujaasipput
Qarasaasiat angallattakkat 19-it Nuummi Grønlands Kontorforsyningimi sisamanngornerup unnuaani tillinneqarput. Paasissutissiisinnaasunik takunnissimasinnaasunillu Nuummi politiit suli ujaasipput.
Allattoq Mads Lynge
februaarip 13-at 2010 13:26
- Aap, suli ujaasivugut, takussutissaasinnaasunillu peqarluta, Gert Kristiansen Nuup politiivineersoq Radioaviisimut ullumi oqarpoq.
Qarasaasianik angallattakkanik tillinniartunik takunnissimasinnaasunik tillitaasimasinnaasunilli pisisimasunik politiit ippassaq ujaasilerput, Gert Kristiansenilli oqaatigaa suli saaffiginnittoqarsimanngitsoq.
Qarasaasiat tassaapput Acer, MSI aamma Asus. Nuummi najugallit qarasaasiamik angallattakkamik neqeroorfigitissimagunik, imaluunniit tillinniarnermut atatillugu paasissutissiisinnaagunik, politiinut saaffiginneqquneqarput. Nuummi politiit oqarasuaataat tassaavoq 32 14 48.
