Nuummi mittarfittaassaq ukiumut ulluni 18-ini matoqqasassaaq
Nuummi Atlantikoq ikaarlugu mittarfissaq agguaqatigiissillugu ukiumut ullut unnuallu18-it sila pissutigalugu matoqqasassaaq.
Tusagassiuut Check in naapertorlugu transportministerip (angallannermut ministerip) Ole Birk Olesenip Kalaallit Nunaat pillugu Ataatsimiititaliamut akissuteqaataani tamanna erserpoq.
Akissuteqaammi, Folketingep nittartagaani takuneqarsinnaasumi, aamma allassimavoq Ilulissani Atlantikoq ikaarlugu mittarfissaq agguaqatigiissillugu ukiumut ullut unnuallu 7,3 atorneqarsinnaassanngitsoq.
Akissuteqaammi erserpoq DMIp silap pissusaa pillugu naatsorsueqqissaarnikkut paasisai tunngavigalugit naatsorsuineq ingerlanneqartoq.
AAMMA ATUARUK Mittarfinnut pilersaarut pillugu ilisimasaqarnerulerit
Kisianni angallanneq ullut unnuallu ilivitsut tamakkerlugit uninngasassanerannik naatsorsuinerit paasineqassanngitsut ilanngussatut pingaarutilittut allassimavoq. Ullut unnuallu ilivitsut tassaasut "piffissat sivikitsut (nalunaaquttap akunneri) miffiusinnaanngitsut ataatsimut katinnerat", akissuteqaammi allassimavoq. Tamatuma kinguneraa nalunaaquttap akunneri timmisartortartut nunniffigisinnaanngisaat katikkaanni assigissagaa Nuummi ullut unnuallu 18 sinnilaarlugit timmisartortartut silarlunneranik peqquteqarlutik nunnissinnaanngitsut. Tassa ukiup ataatsip ingerlanerani Nuummi mittarfissaq piffissap 95 %-iani ammasassaaq.
Kangerlussuarmi ukiumut ullut unnuallu taamaallaat 2,7-it timmisartortartut silap ajorneranik peqquteqarlutik timmisartuminnik mitsitsisinnaanngillat, assersuutigalugu nuissat appasinnerinik aamma isikkivilunnermik peqquteqarlutik.
Aningaasaliissutit oqaluttuarisaanermi annertunersaat
Kalaallit Nunaat pillugu Ataatsimiititaliamut ulloq 26. marsi Søren Espersen (Dansk Folkeparti) ullut matoqqasarfissat pillugit apeqquteqaateqarpoq, massakkullu Kalaallit Airports A/S-ip mittarfissanik taakkuninnga marlunnik sanaartorlunilu ingerlatsisussap ilanngussai tunngavigalugit angallanneq pillugu ministeri akissuteqarpoq.
Inatsisartut siorna novembarimi sanaartornissamut inatsisit akueraat, tassanilu Nuummi Ilulissanilu mittarfiit 2.200 meterinut tallineqarnissaat qularnaarneqarpoq. Taassumalu saniatigut aamma Qaqortumi mittarfik nutaaq 1.500 meteriusoq sananeqassaaq.
AAMMA ATUARUK Mittarfinnut pilersaarut akuerineqarpoq
Mittarfiliornissanut aningaasaliineq nunap ataqatigiinnermut attaveqarfiinut aningaasaliinerit Nunatta oqaluttuarisaanerani annertunersaraat. Inatsisartuni akuerineqarnissaa taasisitsissutigineqarmat 18-it akuersipput, qulingiluat akerliullutik marlullu taasinatik, kisianni imaanngilaq tamanna nunatsinni oqallisaajunnaartoq.
Assersuutigalugu suleqatigiit eqimattat Eqimattat Angisuunnguamik taagortut Nuummi mittarfittaassap taarsiullugu Nuup kujataatungaani qeqertami Angisuunnguami inissinneqarnissaa sulissutigaat. Mittarfik Quassussuup 450 meterinik portussusillip saniani salliarnami inissisimammat silaannaap aalaruluttarnera tunngavilersuutigineqarpoq. Saniatigut aamma Nuummi Ilulissanilu putsilertarnissaa akornusersuutaajuartarsinnaavoq.
