Nuummi mittarfik Kommuneqarfik Sermersuumit pigineqarusuppoq
- Nuummi mittarfiup kommunimit akisussaaffigineqalernissaa qangali kissaatigaarput. Taamaaliornermi Nunatsinni mittarfiit allat Namminersorlutik Oqartussanit isumagineqalernissaannik periarfissiilluta. Tamannalu siunertaralugu kommuni ukiuni marlunni ukiut tamaasa 200 millioner koruuninik illuartitsisarpoq, tassalu taakku ilaat mittarfiliornermut qaqugukkulluunniit atorneqarsinnaassallutik.
Steffen Ulrich-Lynge Nuuk TV-mut oqarpoq imalu nangilluni.
- Nuummi mittarfiup 1800 meterimut tallineqarnissaa eqqarsaatigalugu aningaasaleerusuttunit oqaloqateqartareerpugut, kommunip pisortaanera oqarpoq aamma oqarluni, Nuummi mittarfiup utaqqisarfiata isaterneqarnissaa nutaamillu sanaartortoqarnissaa siunertarineqartoq, taanna ullutsinnut naleqqunnerusunngorlugu.
600 millioner koruuninik aningaasalinissaq natsorsuutaavoq
Kommunip pisortaanerata aamma oqaatigaa, Nuup mittarfiata kommunimit akisussaaffigineqalerluni pigineqalernissaa kommunalbestyrelsep tamarmiusup isumaqatigalugu aalajangiifigereeraat, taamatullu 600 millioner koruuninik aningaasaliiffigineqarnissaa aamma isumaqatigineqartoq oqarluni.
Savalimmiuni paasisassarsioreerput
Savalimmiuni mittarfiup, Vagarip mittarfiata 1800 meterimut tallineqarnerani, Savalimmiuni takornariaqarnerup qanoq iluaqutaatigilernera paasiniarlugu, kommunalbestyrelsep Sanarfinermut Avatangiisinullu ataatsimiititaliaa ulluni arfinilinni paasisassarsiornerminni ilaatigut paasiniaavigereerpaat.
