Nuummi meeqqat naamaarniartartut ukiukilligaluttuinnarput
Nunatsinni meeqqat tallimaagaangata ilaat ataaseq naamaartarnermik misiliisimasarpoq. Kisitsisit tupannartut tamakku atuartut 1994-imiit 2002 ilanngullugu peqqissusaannik misissuisimanermi qanittukkut saqqummiunneqartumi atuarneqarsinnaapput. Ajornartorsiullu inunnut qanittumik suliffeqarfinni ilisimaneqarluarpoq.
- Nunatsinni meeqqat amerlasuut naamaarniartarnerat ajornartorsiutaavoq annertooq, taama Nuummi politeeq Karen Marie Meyer, kommunep pitsaaliunermut suleqatigiissitaani SSPK-mi suleqataasoq oqarpoq. Meeqqat naamaarniartartut amerliartunngikkaluartut naamaarniartartut ukiukilliartornerat maluginiarsimagitsik Karen Marie Meyer oqarpoq.
Nuummi meeqqat liimmimik, ikittartut gassitaannik serpalittaatinillu naamaarniartartut politiinit naammattoorneqartarput.
Inatsisit naapertorlugit niuertarfiit 18-it inorlugit ukiulinnut ikittartunik gassitortunik ikittartulluunniit gassitassaannik tuniniaaqqusaanngillat, pisiniarfinnili arlalinni sulisut oqaluttuarput meeqqat ikittartunik gassitortunik ikittartulluunniit gassitassaannik pisiniarlutik misiliisartut siumugassaajuartartut.
Kulturitta illorsuani Katuami pisortap Juaaka Lyberth-ip ajornartorsiut ilisimaarilluarnerarpaa, Katuap perusuersartarfiini serpalittaatit imaarnikut ikittaatillu gassitortut aamma imaarnikut sulisunit akuttunngitsumik nassaarineqartarmata.
Nassaartoqaraangat politiit ilisimatinneqartartut Juaaka Lyberth oqarpoq.
Katuap saniatigut sanaartorfiit gassitortunik atortoqarfiusut aamma naamaarniarfiusartut Karen Marie Meyer oqarpoq.
Meeqqat naamaarsimasut politiinit naammattoorneqaraangata angajoqqaavi inunnillu isumaginnittut attavigineqartarput.
Nuummi meeqqat naamaarniartartut qassioqqissaarneri politeeqarfiup kisitsisaatiginngilai, taammaatorli meeqqat marluk pingasulluunniit sapaatip akunnerup ataatsip ingerlanerani naamaarsimasut naammattoorneqartartut, aammali sapaatip akunnerini allani soqanngivittartoq, Karen Marie Meyer oqaluttuarpoq.
Paarisap siorna sapaatip akunnerani 18-imi inuusuttuaqqat imigassamik aanngajaarniutinillu atornerluisarnerannut akiuiniarneq aallartippaa. Akiuiniarnermi radio aamma iluaqutigineqarpoq, Radiospotini inuusuttuaqqat nipilersortartut Prussic nuannarineqarluartut atorluarneqarlutik.
Paarisap pisortaa Bodil Karlshøj Poulsen oqarpoq paasisitsiniaanermut atortussat atuagassiallu sinerissami atuarfeqarfinnut tamanut nassiunneqarnikuusut.
Aasarsiorneq naappat paasititsiniaanerup ingerlaqqissinnaanissaa pillugu Paarisap sinerissami atuarfiit pitsaaliuinermilu siunnersortit isumasiussagai, Bodil Karlshøj Poulsen oqarpoq.
Atuartut peqqissusaat pillugu misissuinissaq tulleq aappaagu upernaakkut marsimi aallartissaaq. Atuartut peqqissusaat pillugu misissuinermi kingullermi nalunaarusioqataasut, taakkununnga ilaalluni nakorsaq Birgit Niclasen, Naalagaaffiit Peqatigiit peqqinnissamut suliniaqatigiiffissuat WHO kiisalu Paarisa suleqatigiissasut, Bodil Karlshøj Poulsen oqarpoq.
