Nuummi mattaat 20 kilot tillinneqartut
- Tillinniarneq arfininngormat unnuakkut pivoq. Tillinniat kuupeeq aammalu kikiannut qiuutit atorlugit igalaaq aserorlugu isersimapput. Igalaap aserornerani atortut atorneqarsimasut qimaannarneqarsimammata tillinniartoqartillugu kalerrisaarut aallartimmat tillinniat tuaviorlutik qimaasimassasut ilimagivarput, Nunatsinni tunisassianik tuniniaavimmi ingerlatsisoq Malik Hegelund Olsen RG.gl-imut taama oqarpoq.
Tillinniat ilisimasaqarsimassapput
Malik Hegelund Olsenip ilimagaa tillinniat tunisassiat taakkorpiaat inimi tillinniarfiusumi inissisimasarneri ilisimasimagaat.
- Igalaaq aserorlugu inimi tilllinniarfigineqartumi qerititsiviit tunisassiat sulisut pisiassaannik imaqartut inissinneqarnikuupput, tunisassialli nunatsinni tunisassiassat qerititsivissuarmi assiliiviit atorlugit nakkutigineqartumi inimi allamiillutik. Mattaat poortat arlaqartut maaniinnarmiitttut nassaarineqarmata aammalu tillinniat sakkugisimasatik qimaannarsimammatigik naatsorsuutigaarput tillinniat tuaviinnaq qimaasimanissaat, piffiissammi sivisunngitsup iluani kalerrisaarut aalllartimmat nakkutilliisut Matu Security-meersut takkummata tillinniat qimaasareersimapput, Malik Hegelund Olsen oqarpoq.
Pisoq politiinut suliassanngortinneqarpoq, kisiannili tunisassianik tuniniaaviup pisortaa paasissutissanik ujartuivoq.