Nuummi Kalaaliaratoqaq ammaqqissagunarpoq
Siorna tuttunniarnerup nalaani paasinarsimmat, Kalaaliaqqami nutaami tuttut tuniniakkat tamarmik tunineqarsinnaasimanngitsut, ukioq manna pilersaarutigineqalerpoq Kalaaliaratoqaq ukiamut atorneqarsinnaasoq.
Siorna tuttunniarnerup kapisilinniarnerullu nalaani Nuummi Kalaaliaqqami nutaami inissakilliorneq pissutigalugu piniartut aalisartullu tunisakinnerat aaqqiiviginiarlugu, kommunip piniartullu isumaqatigiissuteqarput. Kalaaliaratoqqallu ukiamut atorneqarsinnaanera isumaqatigiissutigineqarluni. Kommuneqarfik Sermersuumit isuma iluarineqaraluarluni aappaatigut ernumanartoqartoq, kommunimi sulisut pisortaat, Bo Top Fisker oqarpoq imalu nangilluni.
- Kalaaliaqqap nutaanngitsup tuttunik nutaami tuniniarneqarsinnaanngitsunut tuniniaaviunissaa isumaliutugaarput.
Bo Top Fiskerip oqaatigaa, isuma tamanna NAPP-imit siunnersuutigineqarsimasoq kommunip tungaaniit iluarisimanngikkaluaramikku.
- Tassami tuniniaaneq iluamik ingerlanneqassappat internettikkut attaviliisariaqassagatta. Tamaattumilli pilersitsinissaq maanna siunniupparput, taamaalilluta piniartut aalisartullu tunisami naliginik aningaasarsisarniassammat, soorlu nutaami taama iliortartugut, Bo Top Fisker oqarpoq.
Kalaaliaratoqaq nutaatut atortorissaartiginngilaq, taamaattumillu isumaqatigiissutigineqarpoq tuttuunerusut tassani taamaallaat tuniniarneqartassasut.
Taama kommunip siunniussinera, Nuummi aalisartut piniartullu peqatigiiffiata, NAPP-ip siulittaasuata Vittus Nielsenip iluarisimaarpaa.
- Kalaaliaratoqqap tapertaalluarnissaa siunniupparput, tassami tuttut piniagaanerisa nalaanni ataatsikkut tuniniaasoqalersillugulu Kalaaliaqqami nutaami inissaasuasoqartaannarpoq, tamatumalu kingunerisarpaa tuttuttat ilaanai taamaallaa tuninisaasarneri, Vittus Nielsen oqarpoq.
Inissaasuanerup aaqqiivigineqarnissaa eqqarsaatigalugu qerititsivinnik amerlanernik peqalernissaq aaqqiissutaasinnaasut ilagigaat, Bo Top Fisker oqarpoq.
- Tuttut siorna tunineqarput 5 tonsit missaanniittut, ukioq mannalu tunisat marloriaatinngussagutsigit taava qerititsivinnik amerlanernik peqartariaqarpugut. Kalaaliaqqami nutaami atugassanik qeritsivinnik marlunnik nutaanik pisereeraluarpugut, taakkuli naammaqqajanngillat, atorfissaqartitarpummi tassaavoq containeri qerititsivik.
Kommuneqarfik Sermersuumi sulisut pisortaat, Bo Top Fisker oqarpoq.
Taassuma ilanngullugu oqaatigaa, inuusuttut kalaaliminertornerulernissaat eqqarsaatigalugu, kommuni misiliiniartoq, oqarasuaatikkut sms-inik emailikkullu inuusuttut nassiussiffigisarniarlugit, Kalaaliaqqaami soqarnersoq nalunaarutigisarlugu.
