Nuummi juulimaaq coronamit killilersorneqarani ukioq manna missaaq

Nuummi ukiuni marlunni kingullerni corona peqqutigalugu killilersuisoqareersorlu, meeqqat inersimasut utoqqaallu qanorluunniit amerlatigalutik, juulimaaq ikiortaalu aqagu tikippata tikilluaqqusinnaanngorpaat.

Juulimaaq ikiortaalu qulimiguulimmut ilaallutik Dronning Ingridip Napparsimmavissuata silataanut aqagu juulliaqqami ullaap tungaani nalunaaqutaq qulinut missapput.

Juulimaarlu takkukkuni meeqqanut napparsimmavimmi juullisiortussanut pulaannginnermini meeqqanut niuffiortunut mamakujuttunik aamma agguaassaaq.

Juulimaaq siornaak 2020-mi siornalu 2021-mi juulliaqqami tikikkami corona peqqutigalugu killilersuisoqarmat eqitaarneqarsinnaananilu qanilleqqusaasimanngilaq. Taamaammallu inut amerlallutik katersuutinnginnissaat pillugu illoqarfiup immikkoortui sisamat tulleriiarlugit qulimiguulimmik taamani miffigisarpai.

Ukioq mannali corona peqqutigalugu killilersuisoqanngimmat juulimaap ikiortaasalu inunnit amerlasuunit tikilluaqqujartorneqarnissaat qilanaarineqartoq peqqinnissaqarfimmi pisortaq Tina Amondsen oqarpoq.

- Juulimaap pisarnertut napparsimmavissuup saanut minnissaa ukioq manna piviusunngorsinnaammat nuannaarutigeqaarput, taanna oqarpoq nangillunilu:   

- Pisartoq ukiut tamarluinnaasa qilanaariuaannarparput, nalunngilarpullu amerlasuunit nuannarineqarluinnartartoq.  

Juulimaap qulimiguulimmik miffissaani assiaqusersuisoqarumaarpoq. Tamanna coronamik pissuteqarani inuit qulimiguulinnut milersunut qanilleqqusaannginnerannik sillimaniarnermillu pissuteqarpoq.

Assiaqusersukkat tamanit ataqqineqassasut Air Greenlandip kaammattuutigaa.