Nuummi isumaginninnermut pisortaq: Meeqqat eqqorneqassapput

Ulloq unnuarlu angerlarsimaffiup aamma Ilaqutariinnermut Pisortaqarfiup akornanni saqitsaannermi meeqqat sumiginnakkat tallimat kilitsissiatut inissitaapput.

Ulloq unnuarlu angerlarsimaffik Illu Paarsivik Danmarkimi siorna 2006-imi immikkoortortaqalerpoq.

Akuersissutilli pisariaqartut pissarsiareqqaarnagit aallartissimanera pissutigalugu, Danmarkimi immikkoortortap matunissaa Ilaqutariinnermut pisortaqarfiup maanna piumasarilerpaa.

Meeqqat tallimat Sisimiunut maanna nuuttussanngornerat, Nuup Kommuneani isumaginninnermut pisortap Vibeke Møller Jensenip assut ajuusaarutigaa.

- Meeqqat eqqorneqartussaapput, saqitsaannermilu taakku eqqarsaatigineqarpallaarsimagunanngillat. Uagut meeraatigut tallimat, Illu Paarsiviup Dybvadimi Danmarkimiittumi immikkoortortaaniittut eqqugaassapput, nassuiaavoq.

Nuup Kommuneani isumaginninnermut pisortaq Illu Paarsiviup Qaqortumiittup Danmarkimi immikkoortortaanut pulaarnissamut periarfissaqartarsimavoq, namminerlu isiminik sulineq takusinnaasimallugu.

- Meeqqat sullinneqarnerat qanimut malinnaaffigalugu takusinnaavarput, katsorsaariaatsit assigiinngitsut atorneqartut, uagutsinnullu assut nuannersimavoq suleriaatsip taamaattup takunera, Vibeke Møller Jensen oqarpoq.

Aperaarput matusinissaq ajornartorsiutinik sunik pilersitsissanersoq.

- Meeqqat pisariaqartitaat tunngavigalugu sullissinerup ingerlasinnaajunnaarnissaa ajornartorsiutinngorsinnaavoq. Meeqqat pisariaqartippaat perorsaanermik ilinniarluarsimasunit sullinneqarnissartik. Pisariaqaqaaq, tassami Illu Paarsiviup Danmarkimi immikkoortortaani perorsaasunik ilinniarsimasunik sulisoqarpoq, taamaammallu meeqqanut ataasiakkaanut tulluarsakkamik sullissineq ingerlanneqarluni.

- Pisumi meeqqat eqqarsaatigineqanngimmata, assut ernumanartutut isigaarput, Vibeke Møller Jensen naggasiivoq.

Ilaqutariinnermut Pisortaqarfimmit oqaaseqartitsisiniaraluaratta iluatsitsinngilagut.