Nuummi innuttaasut eqqissisimakannersimapput
Nalunarusiarineqartut ilaatigut tassaapput, angerlarsimaffinni eqqissiviilliornerit qulingiluat, annersaanerit marluk, biilinik aallarussinerit pingasut, niuiertarfinni tillinniarnerit marluk, aalakoorluni biilerneq ataaseq, imigassamik 1,47 promillemik aamini akoqartoq. Inuk ataaseq imerniartarfimmi eqqissiviilliornermi tigusarineqarpoq, ikiaroornartumik 12 grammimik tigummialik.
Pisoq alla Nuussuup ilaani Atertami arfininngormat pivoq. Tassaavoq inissiat ilaanniit angut 41-nik ukiulik marloriarluni igittoq. Taassumi aappani anisissimavaa, imminornissaminillu sioorasaarilluni.
Atertaq biilinit inunnillu nalinginnaq ingerlaarfigeqqunagu nalunaaquttap akunnerpaaluini assersimaneqarpoq, politiillu gassimik qulliliornartumik atorlutik angut tunniutiinnartissinnaasimavaat. Angut ulloq taanna kingusinnerusukkut iperarneqarpoq, akiligassinneqarnissanilu naatsorsuutigisinnaassavaa.
Politiit maanna eqqartorpaat inunnik ulorinartorsiortitsillutik politiinik pisortaqarfinnilu sulisunik allanik suliakkersuigaangata taarsiissuteqartitsisalernissaq eqqutissanerlugu.