Nuummi inissiat nutaat 190-it sananeqalersut
Inissiat nutaat 190-it Nuummi sananeqalerput. Tamanna Kommunqarfik Sermersuumi kommunalbestyrelsip ippassaq ileqquusumik ataatsimiinnermi akueraa.
Nuummi inissaaleqineq ilisimaneqarluarpoq. Ajornartorsiut tamanna iliuuseqarfiginiarlugu kommunalbestyrelsip siunnersuutit marluk, inissianik 190-inik sanaartorniarnermik imaqartut, akueraa.
Kommunimut pilersaarummut tapiliussami Qinngorpumi inissianik 100-nik Qasigiannguanilu 90-inik sanaartortoqassasoq siunertarineqarpoq. Meeqqerivik skateparkilu sananeqartussanut aamma ilaapput.
Inissiat mikinerumaartut
Kommunimut pilersaarummut tapiliussatut siunnersuutip mikinerumaartunik, pingaarnertut ilinniartunut ilaqutariinnullu isertitakinnerusunut inissialiornissaq aamma ilaavoq.
Nunaminertat sanaartorfissatut siunnersuutigineqartut ilaqutariinnut ataatsinut illut, affarleriinnut inissianullu uiguleriiaanut nammineerluni pigisatut piginneqatigiillunilu inissianut atugassanngortinneqassapput. Inissiat taama ittut ujartorneqaqisut kommuni allappoq.
Nuummi innuttaasut amerliartormata inissianik sanaartornissaq pisariaqalersimasoq, kommuni taama inassuteqarpoq.
