Nuummi iliveqarfik serlersaarfigineqartoq: Assorsuaq alianarpoq

Nuummi iliveqarfitoqaq serlersaarfigineqarsimavoq.

Kalaallit Nunaanni politiit uppernarsarpaat, tamanna pillugu saaffiginnittoqarsimasoq sulili serlersaarisoq nassaarineqarsimanngitsoq.

Nuummi palasiusup Markus E. Olsenip serlersaarisoqarsimanera quaarsaarutigaa.

- Quaarsaarnaqaaq, assorsuaq alianarpoq, inoqateqalersimagatta tassunga killissimasunik, allaat inuit eqqissereersut qasuersaarfii serlersaarfigineqarlutik tamanna soorunami akuerineqarsinnaanngilaq, Markus E. Olsen oqarpoq.

Aatsaat siullermiilinngilaq iliveqarfimmi serlersaarisoqartarnera,Markus E. Olsen isumaqarpoq inuiaqatigiit ineriartornerinut attuumassuteqartoq.

- Anersaakkut ima allaat piitsunngorsimatiginerpugut allaat eqqissereersut toqoreersut qasuersaarfii qanorluunniit iliorsinnaallugit, tamanna sumiginnaanertut taasinnaavara, uagut ilagiit qanoq iliuuseqarnerusariaqarnerput immaqa ersersinneqarpoq, Markus E. Olsen oqarpoq.

Taamalu pisoqaqqissagaluarpat iliuusaasinnaasunik ima siunnersuuteqarpoq:

- Sapaatini naalagiartarnerup avataatigut pisariaqarsimasinnaavoq soorlu immaqa atuarfinni ilinniarfinni aqqusinermiluunniit Brugsenip silataani allanilu immaqa pisuttualaarluni inuit naapillugit anersaaruluutaallu tusaallugit pisoqarsinnaavoq pisariaqarpallu anersaakkut immerlugit, Markus E Olsen oqarpoq. 

Taanna erseqqissaavoq iliveqarfiit aserorterneqarnerinut tunngatillugu iliviutilik akisussaasuusoq iliveqarfilli tamaat isigalugu kommunemi teknikeqarfik akisussaasuusoq.