Nuummi GU-mi rektorertaaq

Birgitte Hertling 56-inik ukioqarpoq atuarfimmilu ilinniartitsisutut ilinniakkami saniatigut Eskimologiimik kandidatitut soraarummeersimalluni.

Kalaallisut siusinnerusukkut atuartitsisarsimavoq Qeqqanilu Ilinniarnertuunngorniarfimmi ilinniartunik siunnersortitut sulisimalluni.

Birgitte Hertling ilaatigut KIIIP-imi atuartitsinermut inspektøritut ukiuni arfineq-marlunni sulinermini, Kalaallit Nunaanni ilinniarnertuunngorniarfinnut tunngasunut tamanut akisussaaffeqarfigisaqarpoq, kiisalu KIIIP-imi immikkoortortamut pisortaagallarfigisimasamini aqutsinermik, allaffissornermik aningaasaqarnermillu aqutsinermik misilittagaqarluni, Namminersorlutik Oqartussat taama ilisimatitsipput.

Birgitte Hertling ilinniartunut siunnersuisutut ukiorpassuarni sulisimavoq. Kingullermik Danmarkimi ilinniartunut kalaaliusunut siunnersortaasimalluni.

Birgitte Hertlingip Henning Ditlevsen Qeqqani Ilinniarnertuunngorniarfimmi rektoritut taarserpaa.