Nuummi biilit amerliartuinnarput

Nuummi biilit amerliartuinnavipput.

2000-imiillu amerleriapiloorsimanerat Nuummi bussertitsisut malugilluinnarpaat.

Nuummi biilit ima amerlilluinnarsimatigipput, ullaakkut arfineq-pingasut missaanni ualikkullu sisamat missaanni biilissagaanni mianersorluinnarluni pisariaqarluni.

2000-imi Nuummi biilit nalunaarsorsimasut 1.408-nik amerlassuseqarput.

Ullumikkullu marloriaatinngorsimapput tassa 2.570-inngorsimagamik.

Tamannalu Nuummi bussertitsisut ulluinnarni ingerlaartarnerminni malugisarneraat Nuummi bussertitsisoq Svend Berthelsen aperaarput.

- Aap malunnartarpoq, angallateruttulernerup nalaani aallarnialeraangatta biilerpassuit siuleriiaartut kinguarsaatigisinnaasarpagut, Svend Berthelsen oqarpoq.

Assersuuteqarpoq ullaakkut suliartukaanerup nalaani aallarniartarnerminnik.

- Arfineq-pingasunut tanneq qulit missaanni Nuussuup tungaanut 400-talikkut aallaraangatta ilummut ingerlaarnitsinni biilerpassuit naaperalereertarpagut. Sipisaq kangilliup nalaaniit Eqalugalinnguit tungaannut kaajallattarissap tungaanut tassanngaanniillu mittarfiup aqqutaa tikillugu atasuinnaavimmik biilit siuleriaaginnaavittarput, Svend Berthelsen oqarpoq.

Taanna nassuiaavoq sulinerminnut tamanna sunniuteqarsinnaasartoq.

- angallateruttulernerup nalaani aallarnialertilluta ilai ataqqinnippallaarneq ajorput kinguaattooqajaalersinnaasarpugullu, oqarpoq.

Svend Berthelsen aamma isumaqarpoq illoqarfiup angissusaanut sanilliullugu biilit amerlavallaartut. Illoqarfik blokkinik sanaartorfigineqartorujussuuvoq biilerpassuillu amerliartornerat malunnaqaaq, taama oqarpoq biilertartut sinniisuat Svend Berthelsen.

Nuummiinnarli biilit amerliartunngillat, 2001-imi nuna tamakkerlugu biilit nalunaarsorsimasut 4316-ipput.

2005-imilu amerleriarsimapput biilit 5065-inngorsimagamik