Nuummi aviisit unammisut
![](/sites/default/files/styles/image_934x467/public/article_images/gratisaviser630.jpg?itok=MKaLU4Tw)
Nuummi aviisit akeqanngitsut Nuuk Ugeavis aamma Tiu Tiu decembarimi nutaamik unammillerteqalerput Naqitat saqqummersittalermassuk Nutaat. 2012-mi paasinarsissaaq tamarmik pingasuullutik ingerlaannarsinnaanersut.
Nutaat saqqummertalerpoq Sermitsiaq-AGp taamalu Nuuk Ugeavisip naqitertarnerat Danmarkimut nuunneqarmat aamma Tiu Tiu Islandimi naqitertalermat. Naqitani suliffissat pigiinnarusullugit Nutaat saqqummertalerpoq.
- Siunertarinngilarput Nuuk Ugeavisip aamma Tiu Tiup ipitinnissaat. Nutaaliorpugut kalaallinut suliffissat pigiinnarusullugit. 14-nik sulisoqarput tamarmillu kalaaliupput suliffiillu pigiinnarusullugit nutaanik isertitsiffissarsiortariaqarsimavugut, Sven Lyse KNR-imut oqarpoq.
Unammillertaali ernumaammersimapput aviisit akeqanngitsut ataatsimik ilammata annoncet pissarsiarineqarsinnaasut amerlinavianngimmata.
- Tamanna Tiu Tiu-mut ernumanartoqarsinnaavoq, Tiu Tiu-mik piginnittoq Jens-Jakob Lennert-Sandgreen KNR-imut oqarpoq. Taamaattorli siunissaq pillugu erseqqissumik oqaaseqarsinnaanani unnerpaa.
- Kisianni tassa aalajangersimasunik aningaasartuuteqarpugut sillimmasiisarnermut, naqitertarneranut siammartertarneranullu. Kaaviiaartitatta 70 procentia missaliorlugu naqiterinermut siammarterinermullu atortarparput. Taamaammat naqitertittarnera Islandimut nuussimavarput. Unammillertit ilanerat qanoq kinguneqarumaarnersoq 2012-mi paasinarsiumaarpoq, Jens-Jakob Lennert-Sandgreen nassuiaavoq.
Aammattaaq2 Sermitsiaq-AG-mi ernumaammersimaartoqarpoq. Taakku aviisini ajornartorsiorneq aqqusaareersimavaat aviisit kattunnerannik kinguneqarsimasoq. Isertitallu ikilippata arlaannaannulluunniit attuumassuteqanngitsumik tusagassiortarneq kinguariarsinnaavoq.
- Inuiaqatigiinni 56.000-iinnaavugut tassanilu taamaallaat inissaqarput tv-qarfik radioqarfillu ataaseq, nutaarsiassalerinermi nittartagaq ataaseq aviisit marluk kiisalu aviisi akeqanngitsoq annoncenik imaqartoq. Pingaartorujussuuvoq inuiaqatigiinni annoncenit isertitat tusagassiornermut atorneqarnsisaat, tusagassiuteqarfimmi Sermitsiaq-AG-mi pisortaq Poul Krarup KNR-imut oqarpoq.
Akeqanngitsunik aviisinik saqqummersitsisartut pingasuusut 2012 pissangallutik iserfigaat ukiup ingerlanerani paasinarsissammat tamarmik pingasuullutik ingerlaannarsinnaanersut.
- Ingerlaannarnissarput Nutaat kisimik qulakkeersinnaanngilaat. Sullitassanik nutaanik ujartuisariaqarpugut maannallu neriunartumik ingerlavugut aamma aviisit uteqqikkusukkunik tikilluaqqusaakutsoorput. Kisianni oqaatigisariaqarparput akitigut unammillersinnaannginnatta suliffeqarfinnut uagutsinniit 50-riaammik anginerusunut, Sven Lyse oqarpoq.