Nuummi atuarfik meeqqanit ikuallatsinneqartoq
Nuummi atuarfiit ilaat Ukaliusaq ippassaq ullaassakkut pingasut eqqaanni ikuallatsinneqarpoq. Politiit qatserisartullu nalunaaquttap akunneri arlallit atorlugit inneq qaminniarsaraat, atuarfiullu ilaa atorsinnaajunnaarluni ikuallappoq. Nuuummi politiit ikuallatsitsisut ippassaq nanivaat, tassami meeqqat arlallit ikuallatsitsinermi najuussimammata.
- Meeqqat pasineqartut tallimat apersorpavut, taakkulu tamarmik ikuallatsitseqataasimallutik nassuerput. Johan Westen Nuummi politiineersoq taama oqarpoq.
Matumani pineqarput meeqqat tallimat. Taakunannga pingasut qatanngutigiiullutik. Taakku angajullersaat 1998-imi inunngortuuvoq nukarlersaallu 2000-imi inunngortuulluni. Meeqqat taakku tamarmik inunnik isumaginnittut peqataaffigisaannik killisiorneqareerput. Tamarmillu pisuunertik nassuerutigereerpaat. Meeqqat pineqartut ukiukinnertik pissutigalugu unnerluutigineqassanngillat. Meeqqat pilersaarutigeriikkaminnik ikuallatsitsisimanersut qularnarpoq. Meeqqat ikioqqullutik taamaaliorsimanissaat politiit ilimagaat.
- Meeqqat taakku qatanngutigiit pingasuupput, ataatsimillu qatanngutisiaqarlutik, marlullu ilaqutariinnit allaneersuullutik. Immaqa ikiorneqarnissaminnik nilliaateqarsimasinnaapput arlaatigut, kisianni tamanna inunnik isumaginnittut isumagissavaat misissorlugulu, Johan Westen oqarpoq.
Atuarfiup illutaa annertuumik ajoquserneqartoq Johan Westenip Nuummi politiineersup oqaatigaa.
- Ikuallattoq ikuallangaatsiarsimavoq. Aamma atuarfik aqaguagutsiaannaq ammarsinnaanissaa ilimaginngilara. Annertungaatsiartumik aseruisoqarsimammat sivisunerusumik suliarineqarnissaa naatsorsuutigisariaqassaaq, Johan Westen oqarpoq.
Ikuallannerup kingorna aaqqissuisoqarlunilu eqqiaasoqartussaanera pissutigalugu, 1. klassimiit 9. klassimut atuartut marlunngorpat pingasunngorpallu atuartinneqassanngitsut, atuarfiup pisortaata Karno Lyngep nalunaarutigaa.
