Nuummi atuarfiit aallartillualerput
Meeqqat atuarfiini Nuummiittuni tallimanngorpat atualeqqaartoqarpat ilinniartitsisoq ataasiinnaq ilinniarsimasuussanngilaq, sinnerilu ilinniarsimasuinnaassallutik.
Kommuneqarfik Sermersuumi illoqarfiit nunaqarfiillu ataatsimut isigalugit ilinniartitsisut tungaatigut atugarissaarfiupput. Nuummimi ilinniartitsisut tamangajammik ilinniarsimasuinnaanerisa saniatigut Paamiuni ilinniartitsisunit 36-iusunit timelærerit ilinniarsimanngitsut sisamaannaapput.
- Pissutsit tamakku atuartut angusaanut sunniuteqaqaat. Nuummimi ilinniartitsisussaaleqinnginnerup kingunerisaanik illoqarfiup atuartui illoqarfinnut allanut naleqqiullugit misilitsittarnerni angusarissaarnersaasarput, Hans Peter Broberg, Kommuneqarfik Sermersuumi atuarfeqarnermut pisortaq KNR-imut taama oqarpoq.
- Paamiuni ilinniartitsisussaqarniarnerup ilorraap tungaanut ingerlanera malugereerparput taqqavani atuartut angusaat aamma pitsanngoriartormata, Hans Peter Broberg oqarpoq.
Qeqertarsuatsiaani atuarfimmi ilinniartitsisut tamavimmik ilinniarsimasuupput, aammalu Arsummi ilinniartitsisunit arfiniliusunit ataasiinnaq ilinniarsimasuunngilaq.
Kommuneqarfik Sermersuulli ilaani, tassa tunumi pissutsit allaaneroqaat. Tasiilammi atuarfiani 62-inik ilinniartitsisoqarfiusuni atorfiit 15-it ilinniarsimanngitsunik inuttaqarput, Illoqqortoormiunilu timelærerinik ilinniarsimanngitsunik suli atorfissaqartitsisoqarpoq, ilinniartitsisutut atorfinnit 16-iusuniit arfineq marluk ilinniarsimanngitsunik inuttaqarmata.
- Ilinniartitsisut kalaallisut oqaasillit tunumi atorfinitsinniartarnerat suli ajornartorsiutaavoq. Taamaammat tunumi ilinniartitsisut amerlanersaat qallunaatut oqaasiliupput. Tunumimi illoqarfiit avinngarusimanerujussuisa kingunerisaanik ilinniartitsisut kalaallisut oqaasillit kitaani suliffeqarumanerusarput. Aamma tunumi inuttut ajornartorsiutaasartut pillugit tusatsiartakkat aallaavigigunarlugit kalaallisut oqaasillit tunumi ilinniartitisunngorumallutik qinnuteqarumaneq ajorput, Hans Peter Broberg oqarpoq.
Qaasuitsup Kommunia
Ilulissani Qaasuitsup Kommuniata ataaniittumi atualeqqaartoqareerpoq. Kommuneqarfimmili tassani atuartitsisut ilinniarsimanngitsut - tassa timelærerit - suli pisariaqartinneqarput.
Qaasuitsup Kommuniani ilinniartitsisut 386-iupput, taakkunanngalu 106-it ilinniarsimasuunatik.
- Kommunitsinnili ilinniartitsisoqarniarnerput ilorraap tungaanut ingerlavoq, siornaammi ilinniartitsisut ilinniarsimanngitsut 119-it atortariaqarsimavagut, tassalu ukioq atuarfiusoq kingulleq 106-iinnanngorsimallutik, Qaasuitsup Kommuniani atuarfeqarneq pillugu pisortaq Hans Eriksen KNR-imut taama oqarpoq.
Qaasuitsup Kommuniani ilinniartitsisoqarniarneq qanoq inissisoqassanersoq oktobarimi aatsaat paasinarsissaaq.
Kommune Kujallermi ilinniartitsisoqarniarneq pillugu naatsorsuineq suli naammassinngilaq.
- Maanili siornatigumut naleqqiullugu inissisimanerput pitsaanerulersimasoq oqaatigiinnarsinnaavara, Jens Korneliussen, Kommune Kujallermi atuarfeqarfinnut ingerlatsivimmi pisortaq KNR-imut taama oqarpoq.
Ilinniartitsisussaqarniarneq pillugu Qeqqata Kommunia suli paasissutissanik pissarsiffiginngilarput.
