Nuummi arlaleriarlutik tillinniarsimasut tigusarineqarput

Ukiortaap kingorna Nuummi tillinniarnerpassuit politiit ilungersorlutik paasiniaaffigaat, tamatumalu kingorna marlunngorneq februaarip aappaani angutit inuusuttut marluk 20-nik 27-nillu ukiullit tigusarineqarput.
Allattoq Peter Troelsen, Noah Mølgaard
februaarip 14-at 2013 10:37

Angutit taakku marluk inatsisit tunngaviusut tunngavigalugit februaarip 13-at eqqartuussivimmi killisiorneqarput.

Nuup Eqqartuussivia aalajangerpoq angutit ulluni 27-ni tigummigallarneqarnissaannik piumasaq malinniarlugu. Tigummigallarneqartup aappaata tamanna Nunatta Eqqartuussivianut ingerlateqqippaa piumasaali suli maanna isummerfigineqanngilaq. Paasiniaaneq pissutigalugu annertunerusumik maanna paasissutissanik saqqummiussaqarsinnaanatik, vicepolitikommisær Pavia Kleist oqarpoq.

Periarfissaq manna iluatsillugu politiit inuttaasunut kaammattuutigaat igalaat matulluartarnissaa matullu parnaarnissaata eqqaamasarnissaa paasinarmat ullaap tungaa tillinniarnerit arlallit pisarsimasut. Arlalialuit aamma unnuaanerani tillinniarfigineqartarsimapput naak illup inui angerlarsimagaluartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq