Nuummi annertuumik ikuallattoqarpoq

Nuup ilaani Fiskerby-mi ikuallanneq pillugu politiit paasissutissaataat suli killeqarput. Ikuallannermi tassani inissiat marluk najugaqarfigineqarsinnaajunnaarallarput arfininngornerup ullaassaani ikuallannerup kingorna. Ikuallannermi inunnik ajoqusertoqanngilaq.

- Suliaq suli ingerlavoq isummerfigineqassaarlu suliamut atatillugu unnerluussisoqassanersoq, Nuummi politiini pigaartuusoq Kasper Berthelsen nalunaarpoq.

Sapaatip akunnera qaangiuttoq Nuummi politiit ulapaarsimaqaat sapaatip akunnerata ingerlanerani inuit 16-it tigusarineqarmata. Tigusarinninnerit arfineq pingasut ikiaroornartulerinermut tunngassuteqarput.

Sumiiffinni arlalinni politiit pakasaallutik misissuiartortarsimapput ikiaroornartumik hash-imik aningaasanillu ujarlerlutik.

Inuk ataaseq imigassartorsimalluni biilertoq unitsinneqarsimavoq. Inuillu arlallit politiinut nalunaartarsimapput imigassartorsimalluni biilertunik pasillerlutik imaluunniit inuit pasinartut biilit eqqaanni saqisut unnerlugit.

Biilillumi marluk snescooterillu marluk tillinneqarsimapput.

Nuummi politiit aamma ulapputigisimavaat tillinnerit tillinniarnerillu. Kavaajaartarfinni, taskini inissianilu tillinnerit pisarsimapput ilaatigut tillinneqarsimalluni Playstation 3-p aquutaa. Angallatit marluk aamma tillinniarfigineqarsimapput.

Nuummi politiit aamma arlaleriarlutik saaffigineqarsimapput inuusuttut laserinik qorsunnik sakkortuunik timmisartunut biilinullu seqersitsisaartut pillugit. Inuusuttut arlallit politiit oqaloqatigisimavaat angajoqqaavi ilanngullugit. Politiit kajumissaarutigaat taamaattunik pinngualinnut angajoqqaajusut meeqqaminnut oqaassequllugit pinngussat taakku kukkusumik atornerat ulorianarsinnaasoq.