Nuummi angutit nukittunersaat nassaarineqarpoq
Unamminerup immikkoortua siulleq timigissartarfiup Fit and Funip silataani arfininngormat ualikkut aaqqissuunneqarpoq.
Lastbiili 15 tonsinik oqimaassusilik unamminermi peqataasunit qulingiluaasunit meeterinik 20-nik nutsunneqarpoq. Ajugaasoq tassaavoq ajugaasussatut ilimagineqartoq Aputsiaq Fleischer Høy.
Taassuma sikuntit 24,9-t atorlugit lastbiili meeterinik 20-nik nutsuppaa. Aputsiaq Fleischer Høy 101-imiit 110-nut oqimaassusillit akornanniippoq. Unammeqataa aamma 101-imiit 110-mut oqimaassusillit akornanniittoq Ineqi Kielsen ajugaasumut tulliuvoq. Taassuma sikuntit 25,8-t atorpai.
Nuummi angutit nukittunersaat siullerpaamik 2009-mi unammissutigineqarpoq, ukiullu tamaasa pisarluni.
Unamminerup immikkoortuata aappaa oktobarimi pissaaq, tassanilu unammeriaatsit assigiinngitsut pingasut unammissutigineqassasut GIF-imit ilisimatitsissutigineqarpoq.