Nuummi angerlarsimaffinni ikiortit amigaatigineqarput

-Ikiortinik unitsitsisarnitsinni nalunaaruteqartoqartannginneranerit ilumuunngillat, Nuummi angerlarsimaffimmi ikiortit ningiuata Elga Kristensen oqarpoq:

-Upernaap ingerlaneraniit sulisunik napparsimasoqartarsimavugut, ilaanni piffissami sivisuumi, aasallu ingerlanerani sulinngiffeqarnerup nalaani taartissanik amigaateqartorujussuuvugut. Upernaaq aasallu ingerlanerani ikiortinik unitsitsisariaqartarnikuunerput annertuvoq aap, Elga Kristensen oqarpoq.

Utoqqaat ilaasa ilaatigut qaammat ataaseq ikiorteqanngitsoortarsimanerat pissusissamisoornersoq apeqqutigigatsigu ima akissuteqarfigaa:

- Naamik pissusissamisunngilaq, tamanna qaqutigoortorujorujussuuvoq taamaattoqarsinnaasarnera, immaqalu ataasiakkaaginnaat taamatut misigisaqartarsimassapput, pissutigalugu qaammat ataaseq utaqqititsisarneraaneq uanga ilisarisinnaannginnakku, Elga Kristensen nassuiaavoq.

Apeqqutigaarput paasisimasatsitut angerlarsimaffimmi ikiortinik unitsitsisoqaraangat, tamanna ornitassanut sooq ilisimatitsissutigineqartarsimannginnersoq, tamanna ima akissuteqarfigaa:

-Tamanna ilumoorsorinngilara, pissutigalugu uagut pisussaaffigaarput taakku taamaatsinneqartut sianerfigissallutigit ilisimatillugit ullumikkut orninneqarsinnaanngikkallartut. Taamaatitsinernik ilisimatitsisannginneraaneq ilumuunngilaq. Ikiortimmi maanga suliartortarput, ingerlaannaq ikiugassanut angerlarsimaffinnut toqqaannarlutik suliartorneq ajorput, maanngaanniimmi ullup ingerlanerani attaveqarfigiuaannarpagut taamaalilluta malittarisinnaasaratsigit, Elga Kristensen nassuiaavoq. Aperaarpullu tusagassiuutitigut utoqqaat ikiorteqartarnermut tunngatillugu naammagittaalliuteqarnerat ilumuunngitsoq, tamatumunnga Elga Kristensen ima akivoq:

-Ilumoortortaqarsinnaapput, soorlu una eqqarsaatigalugu; ilaanni sivisuumik orniguttoqanngitsoortartoq, taannami ilaanni avaqquneqarsinnaasanngilaq, pissutsimmi taamaaleriasaarsinnaasarput, soorlumi upernaaq manna aasallu ingerlanerani taamaattoqarsimavoq, tamanna sulisussaaleqinermik peqquteqartoq oqaatigereerpara. Aamma apeqqutigaarput, naammagittaalliutigineqartunut ilaasoq, tassa ikiortit suliaminnik naammassinnissinnaasannginnerat qanoq oqaaseqarfigisinnaaneraa, Elga Kristensen tamanna pillugu ima akissuteqarpoq:

-Uanga isumaqarpunga ikiortit ikiugassartik sapinngisannguartik tamaat ikiorniartaraat. Ikiortit malittarisassaqarput suna suliarissaneraat sunalu suliarissannginneraat, taanna Namminersornerullutik Oqartussat malittarisassaanni erseqqissumik allassimavoq. Taamaammat immaqa ilaanni suliassanik killiliisariaqaraangata paatsoorneqartarput, taamaasillutik naammagittalliornerit aamma takkussinnaasarlutik, taama oqarpoq, Elga angerlarsimaffimmi ikiortit ningiuat Elga Kristensensen.

Angerlarsimaffimmi ikiortinik unitsitsisarnerit aasaq manna sulinngiffeqareernerup kingorna ajornartorsiutaavallaarunnaassasoq aamma ilimagaa, erseqqissaassutigaalu angerlarsimaffimmi ikiortit akisussaassuseqarluartumik suliaminnik suliarinnittarmata.