Nuummi angerlarsimaffeqanngitsunut unnuisarfeqalissasoq
Nuummi inimminnit anisitaasunut inissiigallartarfik Namminersorlutik Oqartussanit pigineqartoq Kommuneqarfik Sermersuumit 6,3 millionit koruunilerlugu pisiarineqartoq Kommuneqarfik Sermersuup nalunaarutigaa.
Anisitaasunummi inissiigallartarfik Namminersorlutik Oqartussanit 2015-imi ammarneqartoq atorneqanngilluinnangajassimavoq, Nuummilu angerlarsimaffeqanngitsut maanna unnuisarfeqalissapput, inunnullu 36-nut angerlarsimaffeqanngitsunut inissaqartussanngorpoq, kommunimilu borgmesterip tamanna nuannaarutigaa:
- Illoqarfiit pingaarnersaanni inissaaleqineq ajornartorsiutaasoq isertuunneqanngilaq. Nuummut nuukkusuttut amerligaluttuinnarneri ilutigalugu inissianik neqeroorutit ikiligaluttuinnarput tamassumalu pilersitaanik sivikitsumik sivisunerusumilluunniit inissaaruttarneq takornartaajunnaarluni, Kommuneqarfik Sermersuumi borgmesteri Asii Chemnitz Narup tusagassiuutinut nalunaarummi taama ilaatigut allaaserisaqarpoq.
Angerlarsimaffeqanngitsunut unnuisarfissap pilersaarutit naapertorlugit aappaagu februaarimi ammarneqarnissaa siunniunneqarpoq.