Nuummi aasaru ivigaasaaqqanik arsaattarfeqalissaaq
Aalisakkerinermimmi suliffeqarfissuaq Polar Seafood Nuummi arsaattartut kattuffiannut NBU-mut 500.000 koruuninik ullumi tunissuteqassaaq.
Aningaasat tunissutigineqartut Nunatsinni ivigaasaaqqanik arsaattarfiit anginersaannik pilersitsinissamut atorneqassapput. Tamannalu aasaanerani pissaaq, Nuup ilaani Nuussuarmi arsaattarfik pioreersoq ivigaasaaqqanik, nunarsuarmi sumiiffinni allani arsaattarfinni atorneqartartut assinginik, qallerneqassalluni.
- Timersornerup iluani ineriartorneq tapersersorusupparput, ilaatigut isikkamik arsaanneq, timersuummi taanna Nunatsinni nuannarineqartupilussuuvoq, Anders Brøns Polar Seafoodimeersoq taama oqarpoq.
- Timersorneq meeqqanut peqqinnartumik sammisaqartitsivoq unammillersinnaassuseqartitsilersarlunilu, meeqqat taamaasillutik inuunermi aporfiusinnaasut qaangerniarnissaannut nukittorsaatigisarpaat, umiarsuaatilik taama oqarpoq.
AAMMA ATUARUK Qeqertarsuaq ivigaasaaqqanik arsaattarfittaalersoq
Isikkamik arsaannerup iluani qaffassaataassaaq
Christian Laursen Nuummi Arsaattartut Kattuffianneersoq qilanaarpoq:
- Ivigaasaaqqanik arsaattarfiit nunarsuarmi sumiiffinni assigiinngitsorpassuarni nalinginnaaleraluttuinnarput, maanilu nunatsinni isikkamik arsaannerup iluani qaffassaataassaaq, taama oqarpoq.
Kalaallit arsaattartut pikkorissut ineriartuutigisinnaassagaat qularutiginngilaa, ilaallu immaqa nunani allani ligani siunissami arsaattartunngorsinnaassallutik.
- Assammimmi arsartartuvut taama pipput, sooq taava isikkamik arsaattartuvut taamaalissanngillat, Christian Laursen, Polar Seafoodimit checkimik 500.000 koruuninik aningaasartalimmik ualeru tigusisussaq taama aperivoq.
Nuussuarmi arsaattarfik 44x68 meteriussaaq - allamullu naleqqiutissagaanni - Københavnimi Telia Parken 68x105 meteriulluni.