Nuummi aalisakkerivik sulisussaaleqivoq
Saarullippassuit sapaatip akunnerani kingullermi Nuummut tulaanneqartut suliarineqarnissaannut inuit aqqaneq-marluk pallillugit amigaatigineqarput. Taamaammat Nuummi aalisakkeriviup sulisussaaleqinera Nuup Kommuniani Suliffeqarnermut Piginnaanngorsaaqqinnermullu Aqutsisoqarfiup iliuuseqarfiginiarpaa.
juulip 08-at 2008 05:31
- Aalisakkerivinni sulisussaaleqineq ilungersunartutut isigaarput, akunnialunnguilli atorlugit piffissalerneqarlutik inunnik suliartorsinnaasunik tamatigut pissarsisinnaaneq ajorpugut, Nuup Kommuniani suliffeqarnermut ataatsimiititaliami siulittaasuugallartoq, Erik H.K. Heilmann, oqarpoq, nalilerujussuillu, soorlu saarulliit, maangaannartinneqannginnissaat anguniarlugu suliffeqarfiit piffissaagallartillugu sulisussarsiortarnissaat pingaaruteqarluinnartuunerarlugu.
- Aqutsisoqarfiup fabrikki upernaap ingerlanerani ataatsimeeqatigisarpaa, suliffeqarfillu suleqatigalugu pisariaqartitsinissaq siumut naatsorsorniarsimallugu, Erik H.K. Heilmann Nuup kommuniata nittartagaani issuarneqarpoq.
