Nuuk uuliasiornermut qitiusumik umiarsualiviorusuppoq
Royal Arctic Linemiit Danbor Servicemiillu Nuummi kommunalbestyrelsi ikaarsaariarnermullu ataatsimiititaliaq uuliasiortoqarnissaanut qalluisoqalersinnaaneranullu Nuup talittarfiata qanoq tulluarsarneqarsinnaaneranut pilersaarutit pillugit ataatsimeeqatigeereerput.
Nuup Kommuneata nittartagaani allaaserineqartut naapertorlugit, Nuup eqqaata sikusannginnera aallaavigineqarpoq. Talittarfiit illoqarfimmilu periarfissagissaarnerit saniatigut, sulisussaqarsinnaaneq uuliasiortartut pingaartittarpaat.
Danbor Servicemiit, Mærskimit pigineqartumiit, nalunaarutigineqarpoq, sulisussat uuliasiornermut tunngasunik ilinniagaqarsimasariaqanngitsut, sulisorisinnaasat pineqarsinnaagunik naammattoq.
Danbor Servicemeersut, Royal Arctic Line peqatigalugu, Kalaallit Nunaata imartaani uuliasiortussat suminngaanniit pilersorneqartarsinnaanerat misissorlugu sinerissami ulluni makkunani angalaarput.