Nuuk TV-mi kanalit nutaat isiginnaarneqarsinnaalerput
TV3, amerikamiut nangeqattaartualiaannik reality tv-millu aallakaatitsisartoq, TV3 puls, TV3-p aallakaatittagaasa assinginik aallakaatitsisartoq, TV2 sport 1-ilu, siornatigut TV2 sportimik ateqartup danskillu ligannit nunanilu allani timersornermik aallakaatitsisartoq Nuuk TV-mut ilaasortat siunissami isiginnaarsinnaanngorpaat.
Nuuk TV-mut ilaasortat aamma 3+ sapaatit akunneri 3-4-t iluanni isiginnaarsinnaanngussavaat, taannalu pingaarnertut Champions Leaguemi unamminerit aallakaatittagarai, aamma TV3 sport 2 TV2 Fri-lu maajip aallaqqaataanit isiginnaarneqarsinnaanngussapput.
Nutaarsiassalerituut TV2 News aamma qilanaarisinnaavaat, taanna Danmarkimi ukiorpassuarni nuannarineqartupilussuuvoq. Ulloq unnuarlu nutaarsiassaqartitsiviuvoq DR Updatemullu allaanerussutigaa ullup annersaani toqqaannartumik aallakaatitsisarami minutsillu qulikkuutaarlugit aallakaatitseqqiinnartarani. Aammattaaq TV2 Film Danmarks Radiollu kanalitaava DR3 isiginnaarneqarsinnaalissaapput.
Kanalit nutaat inissaqartinniarlugit Nuuk TV-p DR2, Namminersorlutik Oqartussanit neqeroorutaareersoq, DR1 toqqaannartoq, TV2 toqqaannartoq, DR Update, DR-imit atorunnaarsinneqangajalersoq, peerniarpai kiisalu 6´eren nikingatillugu aallakaatinneqartartoq siunissami toqqaannartumik aallakaatittalissallugu.
Nuuk TV-p DR1-imik aallakaatitsiinnarnera eqqumiiginarsinnaavoq, taannami Namminersorlutik Oqartussat neqeroorutaanut ilaareermat. Tassunga taarsiullugu kanali nuannarineqarluartoq DR K, Namminersorlutik Oqartussat januaarip qiteqqunnerani allanik aallakaatittagaqalermat peerneqartoq inissaqartinneqarsinnaagaluarpoq.
