Nuuk Taxi: Inuussutissarsiutinik ingerlataqartut mikinerit Naalakkersuisunit pillarneqarput
Akitsuutinik qaffaasoqarneratigut taxaatillit tamarmik sakkortuupilussuarmik eqqugaassapput, qamutinut motoorilinnut akitsuutinik eqqugaajumanatik taxaatimik assersuutigalugu biilinik innaallagiatortunik, Naalakkersuisut siunnersuutigisaattut, taarsernissaannut periarfissaqannginnamik
-Ikummatissat akiisa akitsuutillu akiisa ukiuni kingullerni qaffakkiartorsimaneri malugereerpagut. Taakku iluarsaassisarfinnut akit qaffasinnerusunik sillimmasiinermullu akinik qaffasinnerusunik kinguneqarsimapput. Taakkuinnaalluunniit pissutigalugit taxaatillit akiliisinnaassutsimikkut tatineqareerput, naalakkersuisullu inuussutissarsiutinik ingerlataqartut mikinerusut akiliisinnaassusaatigut eqqorneqarnissaannik kissaateqartutut isikkoqarsinnaapput, Bjarke Thomsen aamma Erik Jensen Nuuk Taximeersut oqarput.
Qamutinut motoorilinnut akitsuutinik qaffaanissamik isumassarsiap siunertaraa amerlanerusut qamutinik motoorilinnik CO2-mik aniatitsivallaanngitsunik taarsersiunissaannut kajumilersinniarnissaat. Matumanilu biilit innaallagiatortut eqqarsaatigineqarnerupput, tamakkuli Nunatsinni taxaatillit maannakkorpiaq orniginartinngilaat.
Tamakkuninnga tunisassiortut biilit innaallagiatortut ulloq unnuarlu ingerlasinnaanissaat qulakkeersinnaanngilaat, soorlu assersuutigalugu taxatut atorlugit. Biilit innaallagiatortut allaffimmi suliffeqarluni suliffiulluunniit avataatigut nammineq pigisatut atussallugit ajunngilluinnarput, ungasissuliaatiginagit atorlugit. Taxatulli atussagaanni killeqartupilussuupput, allaallumi atorsinnaanngivissorlutik. Nunatsinni qummukajaarpassuaqarpugut silallu Europamut naleqqiullugu nillernerujussuulluni. Aammattaaq piumasaqaataavoq taxa sisamanik ilaasoqarsinnaanissaa taakkulu nassataannik useqarsinnaanissaq. Biilinik innaallagiartortunik, sullitatsinnik ulloq unnuarlu sullissinermut atorneqarsinnaasunik akilersinnaasunillu pissarsiassaqanngilaq, Nuuk Taximi siulersuisut siulittaasuat pisortarlu oqarput.
