Nuuk minguinnerusoq kissaatigineqarpoq
Nuuk minguinnerusoq qulequtaralugu Katuami ippassaq unnukkut nunatsinni illoqarfiit pingaarnersaanni innuttaasunik ataatsimiititsisoqarpoq.
Innuttaasut 40-t peqataaffigisaannik oqallittoqarpoq Ajornartorsiutillu saqqummiunneqartut ilamininngui makkuupput: Amerlavallaartunik, nipiliortunik mingutsitsisunillu biileqarneq, illoqarfiup qorsooqqinnik nunataarukkiartornera, eqqakkanik ikuallaasarfiup angummassinnaannginnera. Taama Nuup Kommunia nittartakkamini ilisimatitsivoq.
Avatangiisit pillugit innuttaasut ataatsimiisinneqarneranni kommunalbestyrelsemi ilaasortat, kommunillu teknikkimut immikkoortortaqarfiani atorfillit peqataapput. Kissaatinik aamma saqqummiisoqarpoq, kissaatigineqartunullu ilaapput pisuinnaat aqqutaat amerlanerunissaat, aqqusernit siorarterneqartarnissaat, illoqarfiup eqqumiitsulianik kusassarneqarnissaa, illoqarfimmilu eqqaavissaqarnerulernissaa.
Saqqummiussat allattorneqassapput taakkulu teknikkimut avatangiisinullu ataatsimiititaliamut saqqummiunneqassallutik. Taakku tulleriiaarissapput avatangiisillu pillugit pilersaarusiornermut ukioq 2010 tikillugu atuuttussamut atatillugu naliliiffigineqassapput.
