Nuuk inunnik aalaaluppoq
Ulloq nalliuttorsiorfiusussaq sioqqullugu Nuuk inunnik aalaaluppoq.
Kunngikkormiut, ministeriuneq nunat allat aallartitaqarfiineersut 17-it nunanillu allanit tikeraat tusagassiortullu 70-init ikinnerunngitsut Nuummut tikerareerput.
Naalakkersuisut siulittaasuat Kuupik Kleist nunat allat aallartitaqarfiineersunik 17-inik aqagu ilassinnissaaq.
Namminersorneq inuiattut ullorsiornitsinni nalliussineqartoq Nuup saavani nalunaaqutaq arfineq-pingasunut qamutilittarnermik aallartissaaq. Naalakkersuisut siulittaasuat Kuupik Kleist oqalugiassaaq. Nuummilu erinarsoqatigiit "Nuna Asiilasooq" erinarsussavaat.
Tamatuma kingorna Kunngikkormiut pisortatigoortumik Naalakkersuisut siulittaasuannit, Inatsisartut siulittaasuannit, Naalagaaffiullu sinniisaanit Nuup saavani tikilluaqquneqassapput, kinguninngualu naalagiaqatigiittoqassalluni.
Namminersornerup nalliuttorsiutigineqarnerata pingaarnersaa, tassalu Namminersornermut inatsit Ataqqinartorsuup Dronning Margrethep Inatsisartut siulittaasuannut Josef Motzfeldtimut, Inatsisartut ataatsimiittarfianni tunniutissavaa.
Pisut tamarmik KNR-TV-kkut toqqaannartumik aallakaatinneqassapput.
