Nuuk Internationale Friskole ammarpoq

Ulluni makkunani meeqqat assuartut atualeqqaartiterput. Aammattaaq Nuuk Internationale friskole-mi atualeqqaartoqarpoq, meeraannaalli kisimik atualinngillat aammali atuarfiat atualeqqaarnersiorpoq, ullumikkummi siullerpaamik pisortatigoortumik ammarneqarpoq.

Nuuk Internationale friskole-p pisortaa Merete Edlefsen aperaarput meeqqat katillugit qassit atualersinneqarnersut.

- 54 missaat.

Taanna oqaluttuarpoq atuartuutissartik ataaseq New Yorkimiit tikittussaasoq aammalu Danmarkimeersut marluk aamma tikissasut.

Merete Edlefsen nassuiaavoq, meeqqat assigiinngitsunik allamiut oqaasiinik oqaasillit atuartuutigisartussaagitik.

Danskisut, kalaallisut tuluttullu ilinniartitsinerup saniatigut, Tyskisut spaniamiusut kiisalu franskisut ilinniartisisoqartassasoq unnerpaa.

- Meeqqat nunani tamalaaneersunik angajoqqaallit atuartuutigissassavagut, maanimi Nuummi suliffeqarfiit nunani tamalaaneersut amerliartuinnavipput.

Taakungali takuniaanitsinni kalaaliaraqarpiarpasinngimmat Merete Edlefsenilu ingerlatiinnarlugu aperaarput sooq taamaannersoq.

- Atuartuutitta amerlanersaat kalaaliaraapput, nalinginnaasumillu akunnerit atugassarititaasut malillugit ingerlasartussaavugut. Unali atuarfik ulloq naallugu atuarfiusinnaasutut aaqqitaavoq, taamaalilluta eqqissisimanerussaagut atuartitsissutigisinnaasagullu pisortatigoortumik atuarfinnut allanut sanilliullugit amerlanerussapput, Merete Edlefsen oqarpoq.

Atuarfik ulloq naallugu atuarfiusussatut aaqqitaappat taava qanoq sivisutigisumik atuartitsisoqartassanersoq apeqqutigaarput.

- Ullaakkut arfineq-pingasuniit sisamat tungaanut maaniissinnaapput kisianni arfineq-pingasup qeqqa takkutereerusukkunik takkussinnaapput tallimallu tungaanut aamma maaniissinnaallutik, Merete Edlefsen oqarpoq.

Taassuma neriuutigaa siunissami 10-11 klasse angullugu atuartuuteqalerumaarnertik tamannali arriitsumik angujartuaarneqassasoq erseqqissaatigaa. Atuarfillu nunatsinni meeqqat atuarfiinut unammillertaanngitsoq aamma erseqqissaatigalugu.

Merete Edlefsen aamma oqarpoq, atuarfimmut namminersortumut atualerumallutik allatsittartut amerliartuinnartut.

Erseqqissaatigaattaaq 4 klasse tikillugu atuartuuteqarsinnaagamik utaqqisunullu allatsittoqarsinnaasoq.